Ötən il Azərbaycana 2,6 milyon əcnəbi turist gəlib. Ən çox ziyarətçi isə Rusiyadan olub.

“İki sahil” xəbər verir ki, bu barədə “Hərəkat” tərtibatçılarının beynəlxalq sammitində Azərbaycan Turizm Bürosunun baş icraçı direktoru Florian Zenqstşmid məlumat verib.

Onun sözlərinə görə, siyahıda ziyarətçilərin sayına görə sonrakı yerləri Türkiyədən gələn turistlər tutub ki, onların axını il ərzində 13 faiz artıb. Bununla yanaşı, Hindistan (108%), Çin (93%), Pakistan (47%), Qazaxıstan (39%), İran (27%) və Səudiyyə Ərəbistanından (22%) gələn turistlərin sayında əhəmiyyətli artım qeydə alınıb. Həmçinin Özbəkistan (17%), Gürcüstan (7%), BƏƏ (2%) və digər ölkələrdən gələnlərin sayında da artım qeydə alınıb.

F. Zenqstşmid qeyd edib ki, Çindən turist axınının əhəmiyyətli dərəcədə artması Azərbaycanın ÇXR vətəndaşları üçün bir il müddətinə vizasız rejim tətbiq etməsi ilə bağlıdır. O əlavə edib: “Azərbaycan Turizm Bürosu viza rejiminin sadələşdirilməsini turizm sənayesinin inkişafında əsas prioritetlərdən biri hesab edir. Hazırda 88 ölkənin vətəndaşları Azərbaycana elektron viza (e-viza) üçün müraciət edə bilər. Üstəlik, bu proses cəmi üç saat çəkir”.

Büro rəhbəri vurğulayıb ki, turizmin inkişafına məsul olan istənilən struktur vizasız ölkələrin siyahısını genişləndirməyə çalışır.