05 noyabr 2019 17:25
114

APOEL rəsmisi: "Qarabağ"la finala bərabər oyunun mənasını anlamırlar

Avropa Liqasının qrup mərhələsinin 4-cü turunda keçiriləcək APOEL - "Qarabağ" oyununa yerli azarkeşlərin marağı azdır.

Qol.az Kipr mətbuatına istinadən xəbər verir ki, Nikosiya təmsilçisi matça bilet satışının aşağı səviyyədə olmasından narahatdır.

Klubun mətbuat xidmətinin rəhbəri Nektarios Petevinos "Super-SportFM"ə açıqlamasında Ağdam klubu ilə oyuna 2 gün qalmasına baxmayaraq, bilet satışında aktivlik olmadığını deyib:

"Belə bir oyuna maraq göstərməyənlər APOEL azarkeşi olduqlarını söyləyə bilməzlər. Xüsusən də, final xarakterli oyundan danışırıqsa. Onlar komandamızın Avropa Liqasında 1/16 final mərhələsinə vəsiqə qazanmasına maraq göstərmirlərsə, başqa nə deyəcəyimi bilmirəm. Dolu tribunalar önündə, güclü azarkeş dəstəyi altında oynamağımızı çox istəyirəm. Çünki bizim indi buna ehtiyacımız var. Görünür, yuxudadırlar, mübarizənin mənasını anlamırlar. Komanda bütün gücünü meydanda qoymağı vəd edir".

Qeyd edək ki, noyabrın 7-də keçiriləcək APOEL - "Qarabağ" matçı Bakı vaxtı ilə saat 21:55-də başlayacaq.