Çin nümayəndə heyəti Yeni Azərbaycan Partiyasının üzvü Mübariz Abdullayevin ailəsinin qonağı olmuşdur

Ölkəmizdə səfərdə olan Çin Kommunist Partiyası Mərkəzi Komitəsinin Beynəlxalq əlaqələr şöbəsinin müdiri Song Taonun rəhbərlik etdiyi nümayəndə heyəti iyulun 23-də Yeni Azərbaycan Partiyasının üzvü Mübariz Abdullayevin ailəsinin qonağı olmuşdur.

Sadə bir Azərbaycan vətəndaşının ailəsi və sosial həyatı ilə tanışlıq xarakteri daşıyan bu görüşdə xalqlarımız arasında dərin tarixi bağlantılardan, ümumi Şərq mədəniyyətinin çalarlarını özündə əks etdirən adət-ənənələrdən, qədim tarixə malik qarşılıqlı münasibətlərdən bəhs edilmişdir.

Mübariz Abdullayev Azərbaycan Respublikası ilə Çin Xalq Respublikası arasında inkişaf etməkdə olan əlaqələrin, hər iki ölkə rəhbərliyinin bu istiqamətdə həyata keçirdiyi siyasətin xalqlarımızın mənafeyinə uyğun olduğunu xüsusi diqqətə çatdırmışdır.

YAP Nəsimi rayon təşkilatının sədri, Milli Məclisin deputatı Məlahət İbrahimqızı Mübariz Abdullayevin mənzilində çay süfrəsi arxasında keçirilən bu görüşün Çin nümayəndə heyətində yüksək təəssürat yaratdığını qeyd etmişdir.