«Mən dəfələrlə demişəm ki, Prezident başda olmaqla, bütün dövlət məmurları xalqın xidmətçisidir» söyləyən dövlət başçımızın əsas tələbi budur ki, qanun qarşısında hamı bərabərdir, Azərbaycan cəmiyyətində korrupsiya və rüşvətxorluq olmamalıdır.
Korrupsiyaya, inhisarçılığa və rüşvətxorluğa qarşı mübarizənin gücləndirilməsi, bu istiqamətdə aparılan islahatların ictimaiyyət tərəfindən yüksək dəyərləndirilməsi sübut edir ki, cəmiyyətdə şəffaflığın təmin olunması naminə dövlətin apardığı siyasət kampaniya xarakterli deyil, ciddi, qətiyyətli, davamlı prosesdir . Qarşıya qoyulan məqsədə çatmaq üçün görülən profilaktik tədbirlər, əhali arasında aparılan maarifləndirmə işinin intensivləşməsi, Prezident İlham Əliyevin ictimai nəzarətin gücləndirilməsi ilə bağlı tövsiyələrinin dəstəklənməsi, yeni texnologiyalar əsasında formalaşan «Elektron hökumət”»in bütün sahələri əhatə etməsi, «ASAN xidmət»” şəbəkəsinin genişləndirilməsi insanları narahat edən neqativ və bürokratçılıq hallarının aradan qaldırılmasında səmərəsini göstərməkdədir.
Korrupsiyaya və rüşvətxorluğa qarşı mübarizənin qarşısının alınması məqsədilə yaradılan, ictimai və sosial xidmətlər sahəsində inqilab adlandırılan, beynəlxalq səviyyədə təbliğ olunan «ASAN xidmət»”in funksiyalarının genişləndirilməsi, xidmət növlərinin artırılması
korrupsiyaya, rüşvətxorluğa, bürokratiyaya qarşı mübarizədə dövlətin siyasi iradəsinin göstəricisidir.
İqtisadiyyatın, aqrar sahənin, həyatımızın bütün sahələrində gündəlik tələbatın, iş prinsipinin «ASAN xidmət»in funksiyalarına uyğunlaşdırılması, biznes sahəsində əməliyyatların elektron variantlarda həyata keçirilməsi demək olar ki, korrupsiyaya qarşı mübarizədə özünü doğruldur. «Sahibkarlıq sahəsində aparılan yoxlamaların dayandırılması haqqında» Qanunun tətbiqi ilə
qeyri-qanuni, əsassız yoxlamaların 2 il müddətinə dayandırılması, insanların həyat və sağlamlığına, dövlətin təhlükəsizliyinə və iqtisadi maraqlara zidd hallar müstəsna olmaqla, digər təftişlərə məhdudiyyətlərin tətbiqi korrupsiyaya qarşı mübarizə məqsədilə həyata keçirildi. «Bir pəncərə» sisteminin, «ASAN xidmət»in təşkili ilə ölkədə sağlam xidmət mühiti formalaşdı. İnhisarçılıq və rüşvətxorluq hallarına qarşı mübarizə tədbirlərinin gücləndirilməsi naminə korrupsiyaya qarşı mübarizə üzrə Dövlət Proqramı qəbul olundu. Şəffaflığın artırılması və korrupsiyaya qarşı mübarizə üzrə Milli Strategiya və onun həyata keçirilməsi ilə bağlı Fəaliyyət Planı təsdiq olundu. «Korrupsiyaya qarşı mübarizə haqqında»” Qanunun qəbulu, neqativ hallara qarşı mübarizə üzrə ixtisaslaşmış qurumların yaradılması «ictimai bəla»ya qarşı ictimai nəzarəti gücləndirdi, gündəlik məsələ kimi aktuallaşdı.
«Biz sahibkarlara subsidiyaları veririk amma, əfsuslar olsun ki, bəzi hallarda bu sahədə şəffaflığa nail ola bilmirik. Subsidiyalar ya ünvana çatmır, ya kimsə onları mənimsəyir, özünə götürür. Bəzi hallarda ümumiyyətcə istehsal olunan məhsulun həcmi artırılır, torpaq sahələri artırılır ki, subsidiyalar daha çox götürülsün» söyləyən Prezident İlham Əliyev qətiyyətlə bildirir ki, sahibkarları incidən, onlardan qanunsuz tələbdə olan şəxslər cəzalandırılacaqlar. Lisenziyaların verilməsində mövcud olan korrupsiya hallarına qarşı mübarizənin gücləndirilməsini tələb edən dövlət başçımız İlham Əliyev diqqətdə saxladığı dərman preparatlarının, avia biletlərin, otellərin qiymətlərində liberallaşdırma siyasəti müsbət nəticəsini verməklə, inhisarçılıq hallarına qarşı mübarizənin gücləndirilməsini də prioritet kimi qarşıya qoydu. Vergi siyasəti ilə əlaqədar ciddi tapşırıqlar verildi.
Ölkəmizdə aparılan kadr islahatlarına uyğun bir neçə rayona təyin edilən yeni icra başçıları ilə videoformatda görüş keçirən Prezident İlham Əliyevin məmurlardan başlıca tələbi ali qanunlar qarşısında vəzifə məsuliyyətlərinə vicdanla yanaşmaq, ictimai davranış qaydalarına uyğun olmayan , insanlığa yaraşmayan, ictimai rəy tərəfindən müsbət qarşılanmayan hallara yol verilməməsidir. «Mən dəfələrlə demişəm ki, vəzifəli şəxslər özlərini normal aparsınlar, insanlarla ünsiyyət qursunlar, insanları incitməsinlər. Onlar özləri, ailə üzvləri qanunu pozmasınlar. Dəfələrlə demişəm, amma nə görürəm, yenə də mənim göstərişlərimi icra etməyənlər var və nəticə nə olur? Onlar özləri bədbəxt olurlar. Azərbaycan ictimaiyyəti hər şeyi bilir. Heç kim qanundan kənarda qala bilməz. Bir nəfər də toxunulmaz deyil. Bax, son vaxtlar bir neçə iş adamı böyük pozuntularla bağlı məsuliyyətə cəlb edilib. Vaxt gələcək ictimaiyyət bu məsələlərlə bağlı məlumatlandırılacaq. Nəyə görə? Ona görə ki, öz məsuliyyətlərini dərk etməmişlər, dövlət əmlakını talamışlar, dövlət vəsaitini oğurlamışlar» söyləyən Prezident İlham Əliyevin məmurlara əsas tövsiyəsi budur ki, rayon rəhbərləri fəaliyyətlərini vətəndaş rəyi, istəyi, tələbi və təklifi əsasında qurmalıdırlar. Əsassız tikintilərə yol verənləri, dövlət malını mənimsəyənləri ciddi cəzalar gözləyir.
«Bir adam da məsuliyyətdən qaça bilməz, xüsusilə dövlət məmuru. Böyük vəzifə sahibi məsuliyyətli olmalıdır. Biz hüquqi dövlətdə yaşayırıq. Cinayət törətmisənsə get cəzasını çək, vəssalam. Ona görə, bir daha demək istəyirəm ki, bu hadisə ilə bağlı konkret təkliflər verilməlidir. Bu gün bütün dövlət məmurlarına, bütün dövlət qurumlarında çalışanlara bir daha xəbərdarlıq edirəm ki, hər kəs qanuna əməl etməlidir, heç kim məsuliyyətdən qaça bilməyəcək… Ədalət bərpa olunacaqdır.» Bu tövsiyələr həm də Prezident tapşırığı, tələbidir. Bu tapşırığın başqa açıqlaması isə budur: Əgər hansısa dövlət məmuru öz işində düzəlişlər edə bilmirsə, yaxud da ki, istəmirsə, qoy özü könüllü şəkildə dövlət işindən istefa versin.
Son aylarda Dövlət Təhlükəsizliyi Xidməti əməkdaşlarının keçirdiyi əməliyyatlardan aydın olur ki, daşıdığı vəzifəsindən, çalışdığı strukturun dövlət əhəmiyyətindən asılı olmayaraq ədalətin meyarı olan qanun qarşısında hamı eyni dərəcədə məsuliyyət daşımalıdır.
Pandemiyanın yaratdığı çətinliklər şəraitində insanların taleyini düşünən, aztəminatlı ailələrin problemlərinin həlli üçün layihələr həyata keçirən dövlətin ayırdığı vəsaitlərin, yardımların mənimsənilməsi isə Tanrı qarşısında bağışlanılmaz günah, vicdansızlıqdır.
Pandemiya ilə əlaqədar bu gün Azərbaycan dövləti vətəndaşların, sağlamlığının, sosial müdafiəsinin qorunması üçün bütün resursları səfərbər edib. Prezident İlham Əliyevin «Dövlət, ictimai təşkilatlar, ilk növbədə, Heydər Əliyev Fondu, ayrı-ayrı sahibkarlar, ayrı-ayrı imkanlı adamlar öz təşəbbüsləri ilə gedib kasıb insanlara əl tuturlar. Bu yardımı mənimsəməyə nə ad vermək olar?! Bu yaxınlarda Heydər Əliyev Fondu tərəfindən göndərilmiş ərzaq paylarını da aparıb öz qohumlarının evlərində saxlayırlar ki, sonra onları satsınlar. Biz buna gözmü yumacağıq? Belə adamlar ən ciddi cəzaya layiqdirlər» sözləri vətəndaş-məmur münasibətlərinin həmişəkindən artıq səmimi olmasını tələb edir. Bu cür insanlıqdan kənar əməllərə yol verənlər cinayətə cəlb olunmaqla, barələrində qətimkan tədbirləri görüldü. «Heç kim qanundan üstün deyil və əgər kim fikirləşir ki, onun yaxınları, tanışları, qohumları, yüksək vəzifəli dostları ona kömək edəcəklər, səhv edir. Qanun qarşısında hamı bərabərdir, Azərbaycan cəmiyyətində korrupsiya və rüşvətxorluq olmamalıdır. Hər halda biz çalışmalıyıq ki, korrupsiya və rüşvətxorluq üçün meydanı həm inzibati yollarla, həm də institusional üsullarla daraldaq. Eyni zamanda, cəza tədbirləri də tətbiq olunur və tətbiq ediləcəkdir» söyləyən Prezident İlham Əliyev yenə də ictimai nəzarəti qanunları pozanlara qarşı mübarizədə ən optimal variant kimi qiymətləndirir.
İşə qəbul və vəzifəyə təyin olunmaq üçün insanlardan rüşvət tələb edilməsini cinayət hesab edən dövlət başçımız bu yolla varlanmaq niyyətlərini cəmiyyətimizin əsaslarını sarsıdan çirkin addımlar adlandırır. Haqlı olaraq bildirir ki, pul verib vəzifəyə gələn adam ilk növbədə o pulun əvəzini çıxmaq üçün cinayətə aparan qanundankənar əməllər törədəcək, dövlət malını oğurlayacaq, başqalarından rüşvət tələb edəcək. Əslində isə məmur təvazökar olmalı, özlərini başqalarından üstün tutmamalı, öz davranışı ilə insanların hörmətini qazanmalıdır. Dövlət başçımızın «Mən dəfələrlə demişəm ki, Prezident başda olmaqla, bütün dövlət məmurları xalqın xidmətçisidir. Məhz buna görə biz bu vəzifədəyik. Buna görə xalq mənə etibar edib və mən təyin etdiyim bütün kadrlardan bunu tələb edirəm. Ancaq əfsuslar olsun ki, bir çox hallarda, bəzi hallarda yox, bir çox hallarda dövlət məmurları özlərini apara bilmirlər. Onlar hesab edirlər ki, onlara hansısa xüsusi imtiyaz verilib» sözləri özlərini ağa, xan kimi aparan məmurlara insanlıq, təvazökarlıq dərsidir.
Korrupsiyanın qarşısının alınması üçün əsas amil olan kadr siyasəti bu prinsiplər əsasında qurulmalıdır: Vətənə, dövlətə sədaqət, peşəkarlıq, şəffaflıq, dürüstlük. Bu cür mənəvi keyfiyyətləri şəxsiyyətində formalaşdıran, gündəlik iş prinsipi kimi yerinə yetirən, haqqında müsbət mənada ictimai rəy formalaşan məmurlar layiqli xidmətləri ilə vəzifə məsuliyyətlərini dərk edir, təvazökarlıqları, mədəni davranışları, səmimiyyətləri ilə el hörmətini də qazanırlar.
Azərbaycan Respublikasının Korrupsiyaya Qarşı Mübarizə Komissiyasının yeni tərkibdə keçirilən ilk iclasında da bürokratçılığa, rüşvətxorluğa, inhisarçılığa qarşı mübarizədə Prezident İlham Əliyevin tövsiyələrinin əsas tutulacağı qeyd edilməklə bildirilmişdir ki, fəaliyyətində ciddi nöqsanlara yol verənlərə, vətəndaş-məmur həmrəyliyinin tələblərinə əməl etməyənlərə qarşı daha ciddi tədbirlər görüləcək.
Xuraman İsmayılqızı, «İki sahil»