Avqustun 4-də Beyrutun dəniz limanında baş vermiş partlayış nəticəsində ölənlərin sayı 157-yə çatıb.

Bu barədə jurnalistlərə Livanın Səhiyyə naziri Həməd Həsən məlumat verib. O deyib ki, ağır yaralanan 120 nəfərin də vəziyyəti kritikdir.

Livan hökumətinin məlumatında bildirilib ki, hazırda partlayışdan sonra itkin düşmüş yüzlərlə insanın axtarışı davam etdirilir. Eyni zamanda, evsiz qalmış 300 mindən çox Beyrut sakini qonşu ölkələrin dəstəyi ilə sığınacaqlarda yerləşdirilir.

BMT-nin Uşaq Fondu da partlayış nəticəsində evsiz və sahibsiz qalan 80 mindən çox uşağın himayəyə götürülməsi təşəbbüsü ilə çıxış edib. Bu məqsədlə 4,4 milyon dollar vəsait toplanması nəzərdə tutulur.

Beyrutun meri Mərvan Əbbud bəyan edib ki, limanda partlayış nəticəsində şəhərə 15 milyard dollar zərər dəyib. O əlavə edib ki, Livan paytaxtının yarısı xarabalığa çevrilib. //AZƏRTAC