“SOCAR Polymer” layihəsi çərçivəsində yüksək sıxlıqlı polietilen zavodu istismara verildi

• İlkin hesablamalara görə, “SOCAR Polymer” kompleksinin tam işə düşməsi ilə ölkənin qeyri-neft sektorunun ixrac gəlirləri 18%, Abşeron iqtisadi rayonunun ümumi daxili məhsulunun həcmi isə 14% artacaq

• İstismar dövründə ümumi gəlir 6.6 milyard dollar, vergilər üzrə büdcə ödənişləri 600 milyon dollar həcmində proqnozlaşdırılır

• Yeni zavod ölkə daxilində yüksək sıxlıqlı polietilenə olan tələbatı tam təmin edəcək, məhsulun 75 faizi xarici bazarlara ixrac olunacaqFevralın 18-də Sumqayıt Kimya Sənaye Parkı ərazisində Azərbaycan Respublikasının Prezidenti İlham Əliyev cənablarının iştirakı ilə “SOCAR Polymer” layihəsi çərçivəsində yüksək sıxlıqlı polietilen zavodunun təntənəli açılışı olub. Mərasimdə SOCAR rəhbərliyi və SOCAR Polymer zavodlarının inşasını həyata keçirmiş şirkətlərin təmsilçiləri iştirak etmişlər. 

Zavodun istismara verilməsi indiyə qədər ölkəyə idxal edilən yüksək sıxlıqlı polietilen məhsuluna tələbatı tam ödəməyə imkan yaradacaqdır. İlkin proqnozlara görə, “SOCAR Polymer” zavodları ildə 10 çeşiddə 184 min ton polipropilen və 4 çeşiddə 120 min ton yüksək sıxlıqlı polietilen istehsal edəcək. Zavodların istismar dövründə 6.6 milyard dollar həcmində gəlir gətirəcəyi gözlənilir ki, bunun da 30 faizini şirkətin xalis mənfəəti təşkil edəcəkdir. Bundan əlavə, istismar müddətində “SOCAR Polymer” tərəfindən dövlət büdcəsinə ümumilikdə 600 milyon dollar həcmində verginin ödənilməsi nəzərdə tutulur. SOCAR-ın yeni sənaye kompleksinin fəaliyyətə başlaması ilə daxili bazarın tələbatı tam təmin olunacaq və məhsulun 75 faizi isə Türkiyə və Avropa bazarlarına ixrac ediləcəkdir. 

Ölkə başçısına məruzə edən SOCAR-ın prezidenti Rövnəq Abdullayev demişdir: “SOCAR Polymer” zavodlarının inşaat işlərinin pik həddində burada 3500 nəfərə yaxın insan çalışmışdır. İstismar müddətində zavodlarda 500 nəfər daimi işçi çalışacaq. İnşaat zamanı əmək normalarının tələblərinə maksimum dərəcədə riayət edilmiş, 18,5 milyon adam-saatdan çox iş həcmi tam təhlükəsizlik şəraitində yerinə yetirilmişdir. İlkin hesablamalara görə, kompleksin istehsalat gücünə çatması ilə ölkənin qeyri-neft sektorunun ixrac gəlirləri 18%, Abşeron iqtisadi rayonunda ümumi daxili məhsulun həcmi isə 14% artacaqdır.” 

“SOCAR Polymer” Azərbaycanın neft-kimya sənayesində dövlət-özəl sektor tərəfdaşlığı əsasında yaradılmış ilk şirkətdir. Şirkətin səhmdarları SOCAR (52,2%), Vitol (19%), Paşa Holding (9,9%), Ecoland (9,8%), Polimer Investments (5%) və AKKIK (4,1%) şirkətləridir. Layihənin icrasında “Maire Tecnimont”, FLUOR, LyondellBasell, INEOS, Golder Associates kimi tanınmış dünya brendləri ilə əməkdaşlıq edilmişdir. Layihənin investisiya dəyərinin 60%-i Rusiyanın “Qazprombank”-ından cəlb edilmiş vəsait hesabına ödənilmişdir. 

Xatırladaq ki, “SOCAR Polymer” şirkəti Azərbaycanda kimya sənayesinin inkişafını sürətləndirmək məqsədi ilə 2013-cü ildə təsis edilmişdir. 2015-ci il oktyabrın 25-də Prezident İlham Əliyevin iştirakı ilə yeni texnologiyalara əsaslanan “SOCAR Polymer” zavodlarının təməli qoyulmuşdur. “SOCAR Polymer” layihəsi çərçivəsində inşa olunan Polipropilen zavodunun açılışı 2018-ci il iyulun 18-də olub. Həmin mərasimdə Azərbaycan Respublikasının Prezidenti İlham Əliyev və ölkəmizdə rəsmi səfərdə olan İtaliya Prezidenti Sercio Mattarella da iştirak etmişlər. Polipropilen zavodundan ixrac edilmiş ilk məhsul ötən ilin oktyabr ayında Türkiyəyə yola salınmışdır.