19 mart 2020 16:21
855

Prezident İlham Əliyev həkimlərin əməyini yüksək qiymətləndirdi

Arzu Nağıyev: Koronavirusla bağlı ən böyük mübarizəni ilk olaraq bu sahədə ön cəbhədə olan həkimlər aparır

Prezident İlham Əliyevin imzaladığı sərəncam onu göstərir ki, dövlətimizin səhiyyə işçilərinə qayğı və diqqəti yüksək səviyyədədir. Bu baxımdan koronavirusla mübarizəyə qoşulan hər bir tibb işçisinin əməkhaqqının 3-5 misli qədər müəyyən edilməsi çox mühüm əhəmiyyət kəsb edən məsələdir və çox vaxtında verilmiş qərardır.

Bu fikirləri AZƏRTAC-a açıqlamasında Milli Məclisin deputatı Arzu Nağıyev deyib. Deputat əlavə edib ki, koronavirusla bağlı ən böyük mübarizəni ilk olaraq bu sahədə ön cəbhədə olan həkimlər aparır. Onun sözlərinə görə, həmin həkimlər öz peşəkarlığı ilə seçilərək həyatlarını riskə atmaqla ilk növbədə şübhəli şəxsləri qarşılayır, onları təcrid olunan ərazilərə aparır, infeksiyaya yoluxan şəxslərin birbaşa müalicəsi ilə məşğul olurlar. “Məlum məsələdir ki, bu, çox riskli işlərdən biridir. Həmin həkimlərin hər an bu infeksiyaya yoluxma təhlükəsi var. Bundan başqa, Operativ Qərargahın tərkibində də həkimlərin üzərinə hər hansı bir qərarı vermək kimi çox böyük məsuliyyət düşür. Məhz buna görə də Prezident İlham Əliyev həkimlərin əməyini yüksək qiymətləndirdi” , - deyə Milli Məclisin deputatı bildirib. A.Nağıyev vurğulayıb ki, bu qiymətləndirmədə də əsas meyar doğrudan da öz peşəsini sevən şəxslərin davranışı, öz fəaliyyətlərini necə həyata keçirməsidir. Deputat əlavə edib ki, hər işdə zəhməti olan şəxsin əməyi həm mənəvi, həm də maddi cəhətdən qiymətləndirilməlidir. Bu həkimlərin fəaliyyətini daha da təkmilləşdirməsi üçün bir stimuldur. Düşünürəm ki, onların əməyi gələcəkdə də qiymətləndiriləcək. Bu gün kimlərinsə evdən, mənzillərdən çölə çıxmasına qadağa qoyulduğu bir halda həkimlər daim öz pasiyentlərinin, infeksiyaya yoluxma şübhəsi olan şəxslərin yanındadır. Buna görə də bu vəziyyətdə dövlət başçısının öz vətəndaşının təhlükəsizliyi üçün həkim əməyini yüksək qiymətləndirməsi onun xalqın yanında olmasını bir daha sübut etdi.

Xatırladaq ki, Prezident İlham Əliyev yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında Sərəncam imzalayıb.

Sərəncama əsasən yeni növ koronavirus (COVID-19) infeksiyası ilə əlaqəli əmək şəraitinə görə dövlət tibb müəssisələrində çalışan işçilərin əməkhaqlarına aylıq vəzifə (tarif) maaşının 3–5 mislinədək miqdarda müddətli əlavə müəyyən edilir.

Nazirlər Kabinetinə bu Sərəncamla müəyyən edilən müddətli əlavənin şamil olunacağı tibb işçilərinin əhatə dairəsini, əlavənin ödənilmə müddətini və işin xüsusiyyətindən asılı olaraq miqdarını müəyyən etmək, COVID-19 infeksiyası ilə mübarizə tədbirlərinə cəlb edilən özəl tibb müəssisələrində çalışan tibb işçilərinin və könüllülərin əməyinin ödənilməsi şərtlərini müəyyən etmək və Sərəncamdan irəli gələn digər məsələləri həll etmək tapşırılıb.