... yoxsa erməni separatizminə dəstək...?!
Ermənistan mətbuatında qondarma separatçı rejimin saxta xarici işlər naziri Masis Mailyanın atəşkəsin 25 illiyi ilə bağlı məqaləsinin ABŞ-da (Vaşinqton) çıxan “The National İnterest” nəşrində işıq üzü görməsi ilə bağlı məlumat yayılıb. Doğrusu, belə həssas bir məsələdə Amerika nəşrinin bu cür addım atması məni təəssüfqarışıq maraqla məlum informasiyanı sonacan oxumağa vadar etdi. Bəli, yazının sonunda “ədəb-ərkanla” nəşrin linkinə də istinad edilib:
nationalinterest.org/feature/nagorno-karabakh-cease-fire-25-57522?fbclid=IwAR0FM6Mpex8uLHIetO8h7fYLLve6XGChUZiBvuPPqNTRBGR0hB5tChOlEnM&page=0%2C1
Təbii ki, biz separatçı ermənilərin hiyləgər lobbisinin dünyanın dörd bir tərəfinə səpələnib hansı aglasığmaz avantüra və təxribatlarla məşğul olduqlarından yaxşı xəbərdarıq. Lakin açığı, “The National İnterest” kimi bir nəşrin bu avantüralara alət, vasitə olacağını düşünməzdim.
Məlumat üçün bildirək ki, 1985-ci ildə tanınmış ekspert İrvinq Kristol tərəfindən təsisi edilən hərbi-siyasi nəşr olan “The National İnterest”in saytına ay ərzində 2-8 milyon arası baxış sayı olur.
Sözügedən məqalənin dərci ilə erməni separatçılarına meydan verən nəşrin redaksiyasının prinsipləri arasında yer alan müddəalarda yazılır ki, ekspert heyəti yazılan məqalələrə müdaxilə etmir, yazı ya qəbul olunur, ya da rədd edilir. Maraqlıdır, doğrudanmı hərbi-siyasi sahədə ixtisaslaşmış bir nəşrin bir neçə nəfərdən ibarət redaktor və ekspert heyətindən bircə nəfər də olsa tapılmadımı ki, Azərbaycanın tarixi torpaqlarında yaradılan qondarma rejimin M.Mailyan adlı nümayəndəsinin cəfəngiyatla dolu cızma-qarasını rədd etsin?! Əgər bunu bilməyərəkdən ediblərsə, bu nüfuzlu bir hərbi-siyasi dərginin peşəkarlığı adına böyük ləkədir. Çünki çoxmilyonlu auditoriyaya malik hərbi-siyasi tematikalı bir jurnalın redaksiya heyətinin Cənubi Qafqaz kimi strateji bir regionda baş verənlərdən və gerçək həqiqətlərdən məlumatı yoxdursa bu, ən azından siyasi savadsızlıqdır.
Yox, əgər bu məqalə bilərəkdən, həm də seçmə yazılar bölümündə gözəçarpan manşetdə işıqlandırılırsa, deməli, bu, təkcə peşəkarlıq və tərəfsizlik adına ləkə olmaqla qalmır, separatçı ermənilərin açıq-aşkar təxribat cəhdinə rəvac verməkdir.
Azərbaycanın işğal edilmiş torpaqlarında üzdəniraq rejimin “səlahiyyətlisinin” məqaləsini dərc etmək haqlı hiddətimizə səbəb olmaqla yanaşı, münaqişə ilə bağlı danışıqların getdiyi ərəfədə bunu körükləyici və təxribatçı addımdan başqa nə adlandırmaq olar?
İşğalçı ölkənin mediasında bu məlumatın bəh-bəhlə tirajlanması da onu göstərir ki, separatçı ermənilər əllərini “The National İnterest”in redaksiyasına qədər uzatmaqdan və həmin əlin orada “tutulmasından” xeyli məmnundurlar. İndiki məqamda bizi düşündürən dünyanın tanınmış “informasiya mətbəxlərinə” əl uzadacaq qədər cəsarətlənən erməni həyasızlığından daha çox, həmin əli tutmağa kimin, yaxud kimlərin bu qədər maraqlı olmasıdır.
Kifayət qədər böyük həcmli məqalədə qondarma sakit tonla və saxta liberal ahənglə hansı sayıqlamaların və cəfəngiyatların yer almasından asılı olmayaraq daha çox yazının altındakı imzanın qarşısında qeyd edilən “vəzifənin” absurdluğu hiddət doğurur.
Bizi narahat edən əsas məqam “demokratiya carçısı” imici yaratmağa çalışan Amerika nəşrinin Azərbaycan torpağında qurulan qondarma rejimin- legitim qurumuş kimi “səlahiyyətlisi”ni təqdim etməsidir.
“The National İnterest” ingilis dilindən hərfi tərcümədə “milli maraqlar” mənasını daşıyır. 30 ilə yaxındır ki, dünyanın nüfuzlu nəşrləri ilə əməkdaşlıq edən və xeyli oxucu auditoriyası toplamış Amerika nəşrinin ən azından öz adına uyğun hərəkət etməsini tələb etmək haqqımızdır. Çünki Ermənistanın işğal etdiyi torpaqlarımızda “yaratdığı” qondarma rejimin az qala təbliğatı fonunda təqdim edilən yazı birbaşa Azərbaycan xalqının və dövlətinin milli maraqlarına ziddir və sözügedən nəşr ən azından tərəfsiz media orqanı olduğunu sübut etmək üçün belə məsələlərə xüsusi həssaslıqla yanaşmalı, fəaliyyətində zəruri məqamları mütləq nəzərə almalıdır.
Sevinc Abdullayeva, “İki sahil”