Türkiyə Amerika Birləşmiş Ştatlarının Türkiyəyə S-400 sistemlərinin satın alınması ilə əlaqədar iyunun əvvəlinədək müddət verməsi iddialarını təkzib edib.
Türkiyə xarici işlər nazirinin müavini Yavuz Səlim Kıran mətbuat nümayəndələrinə ABŞ-dakı görüşləri ilə bağlı açıqlamalar verib.
Kiran ABŞ Nümayəndələr Palatasının Xarici Əlaqələr Komitəsində Türkiyənin Rusiyadan S-400 hava müdafiə sistemlərini almasına qarşı olan qərar layihəsinin ötən gün qəbul edilməsi barəsində fikir bildirərək: "Bu gün qərar layihəsinin konqresdə qəbul edilməsi ilə birlikdə ABŞ-da S-400 hava müdafiə sistemi məsələsinin fərqli bir müstəvidə müzakirə edildiyini təsssüflə müşahidə edirik" deyib.
Xarici işlər nazirinin müavini ABŞ səfəri proqramı çərçivəsində görüşdükləri 6 konqres üzvünə Türkiyənin S-400 alımındakı fəaliyyətlərindən, ABŞ-ın Türkiyənin hava müdafiə sistemi tələbatına müsbət cavab vermədiyindən, bu satın almanın iki ölkənin strateji əlaqələrinə təsir etməyəcəyindən və S-400-ləri alma prosesinin arxa planından bəhs etdiklərini bildirərək: "Biz həm də senatorlar və konqresmenlərin bəzən təəccübləndiklərinin şahidi olduq və arxa plandan xəbərlərinin olmadığını gördük" deyib.
Türkiyənin S-400 məsələsində ABŞ-ın həssaslıqlarını də nəzərə aldığını dilə gətirən Kıran ABŞ rəhbərliyinin S-400-lərlə bağlı işçi qrupunun yaradılması təklifinə hələ cavab verilmədiyini qeyd edib.
Nazir müavini işçi qrupu ilə bağlı: "Bunun ABŞ-ın narahatlığının, S-400 sisteminin F-35 döyüş təyyarələrinin varlığını təhlükəyə atacağı ilə bağlı anlaşılmazlığın aradan qalxmasında mühüm rolu olacağına əminik. Bu mövzuda hər növ diplomatiya və dialoqa açığıq" söyləyib.
Yavuz Səlim Kıran ABŞ mediasında əks olunan ABŞ-ın Türkiyəyə S-400-lərin satın alınması ilə bağlı iyunun əvvəlinə qədər qərar qəbul etməsi üçün müddət verməsi iddiaları ilə bağlı verilən sualı bu şəkildə cavablanırdı: "Bizə belə bir şey rəsmi olaraq bildirilməyib. ABŞ mart ayında "Patriot" larla bağlı bizi təmin etməyən əvvəlki təkliflərini yenidən səsləndirmişdi. Nəzərdə tutulan şeyin bu olduğunu düşünürük".
Türkiyənin S-400 məsələsində hələ də eyni mövqedə olduğunu vurğulayan Kıran S-400 mövzusunun başa çatdırılmış bir razılaşma olduğunu və S-400-lərlə əlaqədar təlimlərin artıq başladığını bildirib.
