Yeni Azərbaycan Partiyasının yaradılmasının 27-ci ildönümü münasibətilə YAP Qazax rayon təşkilatında yubiley tədbiri keçirildi.
Tədbir iştirakçıları Ulu Öndər Heydər Əliyevin büstü önünə gül dəstələri qoyaraq onun əziz xatirəsini ehtiramla yad etdilər. YAP Qazax rayon təşkilatının sədri H.Pənahov çıxış edərək Yeni Azərbaycan Partiyasının yaranma tarixindən, ölkəmizin siyasi həyatındakı rolundan danışdı.
Vurğulandı ki, 1992-ci ilin 21 noyabrında Naxçıvanda 550 nəfərin iştirakı ilə təsis olunan YAP yarandığı gündən ümumxalq məhəbbəti qazanaraq milyonların partiyasına çevrildi. Partiyanın qurucusu ulu öndər Heydər Əliyevin ölkədə yaratdığı demokratik şəraitdən, çoxpartiyalılıq sistemində üzvlərinin sayına, xalqın istək və arzularına uyğun ideyalarına görə fərqlənən YAP-ın təkcə ölkədə deyil, regionda mütəşəkkil siyasi qüvvə olduğu qeyd olundu.
YAP Qazax rayon təşkilatı sədrinin müavini Səfurə Vəliyeva, partiyanın rayon təşkilatı Qadınlar Şurasının sədri Yeganə Göyüşlü, Gənclər Birliyinin sədri Kənan Hüseynli və Şura üzvü Səfurə Rəhimova çıxış edərək təşkilatın keçdiyi yoldan, qazandığı uğurlardan danışdılar.
Yeni Azərbaycan Partiyasının yaradılmasının 27-ci ildönümü ilə əlaqədar YAP Qazax rayon təşkilatı və rayon Təhsil Şöbəsinin birgə təşkilatçılığı ilə ümummilli lider Heydər Əliyevin həyat və fəaliyyətinin, siyasi irsinin öyrənilməsinə aid keçirilən “Heydər Əliyev ideyaları - inkişafa və tərəqqiyə aparan yol” mövzusuna aid inşa müsabiqədə qalib gələn 1-ci, 2-ci, 3-cü yerləri tutan şagirdlərə diplomlar və pul mükafatları təqdim olundu.
Zahid Rza, “İki sahil”