Yerli özünüidarəetmə orqanlarına seçkilərdə iştirak edəcək namizədlərin seçicilərlə görüşləri davam edir. “Xalq üçün” devizi ilə seçiciləri ilə görüşən Yeni Azərbaycan Partiyasının (YAP) namizədlərinə etimad həmişə olduğu kimi, yenə də yüksəkdir. Həmin görüşlərdə yarandığı gündən fəaliyyətini vətəndaş rəyi, istəyi əsasında quran, respublikada aparılan quruculuq işlərində rolu artan bələdiyyələrin üzərinə düşən vəzifələrdən söz açılır , seçici rəyi, təklifləri öyrənilir, ölkədə həyata keçirilən islahatların əhəmiyyətindən danışılır.
YAP Mərkəzi Seçki Qərargahının Yasamal rayon şöbəsində yerli özünüidarətemə orqanlarına seçkilərlə əlaqədar keçirilən növbəti görüşün iştirakçıları təhsil işçiləri idi.
Tədbirdə bələdiyyələrin fəaliyyətindəki yeniliklərdən söz açan YAP Yasamal rayon təşkilatının sədri Tağı Əhmədov iqtidar partiyasının respublikada aparılan quruculuq işlərinin, sosial-iqtisadi islahatların lokomotivi olduğunu bildirərək vurğuladı ki, ulu öndər Heydər Əliyevin siyasətinə sadiqliyini bütün sahələrdə qazandığı uğurlarla bildirən, alternativi olmayan YAP-a ümumxalq məhəbbəti tükənməzdir:
- Bu uğurların təməli 1992-ci ilin noyabrında qoyulub. Azərbaycanın müstəqilliyinin qarantı olan ulu öndər Heydr Əliyevin tarixi xidmətlərindən biri də Yeni Azərbaycan Partiyasını yaratması idi. Partiyanın ətrafına toplaşan sağlam əqidəli insanların birliyi ilə ölkədə sabitlik yarandı. Bu gün Azərbaycan dünyada özünə güvənən, daxili resurslarına arxalanan, müasir ənənələrə bağlı güclü, dünyəvi dövlət kimi tanınırsa, bu uğurda YAP-ın rolu böyükdür.
Partiyanın respublikamızın ictimai- siyasi həyatındakı rolundan bəhs edən Tağı Əhmədov vurğuladı ki, AXC-Müsavat iqtidarı dövründə Azərbaycanda mövcud olan mürəkkəb, gərgin vəziyyətdə yaranan YAP-a sədrlik edən Ulu Öndər xilaskarlıq missiyasını yerinə yetirərək ölkədə demokratik islahatların da əsasını qoydu:
-Azərbaycan xalqı o vaxt bir daha öz böyüklüyünü, müdrikliyini göstərərək ümummilli lider Heydər Əliyevi hakimiyyətə dəvət etdi və 1993-cü ildən başlayaraq bu günə qədər Azərbaycan inkişaf yolu ilə addımlayır. Milli təfəkkürümüzü formalaşdıran azərbaycançılıq ideologiyası xalqda özünə inamı gücləndirdi. Ulu Öndərin qətiyyəti ilə Azərbaycan beynəlxalq təcriddən, informasiya blokadasından çıxdı. Dağlıq Qarabağ həqiqətləri dünya ictimaiyyətinə çatdırıldı.
Bakı Dövlət Universitetinin kafedra müdiri, tarix elmələri doktoru, professor Anar İsgəndərov YAP-ın ölkənin siyasi, iqtisadi həyatındakı fəaliyyətindən bəhs edərək yerli özünüidarəetmə orqanlarında iqtidar partiyasının namizədlərinin, gənclərin çoxluq təşkil etməsini vətəndaşların ulu öndər Heydər Əliyev ideyalarına etimadı kimi dəyərləndirdi:
- Yorulmaz fəaliyyəti ilə bütün sahələr üzrə inkişaf konsepsiyasını müəyyənləşdirən ulu öndər Heydər Əliyevin ideyalarına sadiq qalan partiya üzvlərinin, tərəfdarlarının birlik və həmrəyliyi ilə Azərbaycan güclü dövlətə çevrildi, respublikamıza rəğbət və dəstək artdı. Təməli Ulu Öndər tərəfindən qoyulan sosial-iqtisadi islahatların uğurlu davamı nəticəsində Azərbaycan dünyanın ən qüdrətli ölkələri ilə eyni sırada dayanır. Bu tərəqqiyə, yüksəlişə Prezident, YAP Sədri İlham Əliyevin davam etdirdiyi siyasət nəticəsində nail olunmuşdur. Son illərdə bütün dünya dövlətlərini narahat edən iqtisadi böhran dövründə belə, ölkədə aparılan islahatlar baxımından liderlik qazanan Azərbaycan qədər sürətli inkişaf yolu ilə gedən ikinci ölkə olmayıb. Təbii ki, bu uğurlarda xalqına bağlı, Ulu Öndərin siyasətinə sadiq YAP üzvlərinin xidmətləri və rolu böyükdür. Buna görə də bələdiyyə seçkiləri ilə bağlı keçirilən bütün görüşlərdə mütəşəkkilliklə iştirak edən seçicilər iqtidar partiyasına etimad göstərəcəklərini, daha qüdrətli Azərbaycan naminə səs verəcəklərini bildirirlər.
BDU-nun hüquq fakültəsinin dosenti, hüquq elmləri üzrə fəlsəfə doktoru Samirə Eyvazova çıxış edərək bildirdi ki, dövlət başçımız, YAP-ın Sədri cənab İlham Əliyevin müəyyənləşdirdiyi çoxşaxəli islahatlar insanların rifah halının yaxşılaşmasına da təsir edir:
- YAP-ın prezident, parlament, bələdiyyə seçkilərində böyük səs çoxluğu ilə qalib gəlməsi Ulu Öndərin ideyalarına, daim yenilik hissi ilə yaşayan partiyaya ümumxalq məhəbbətinin ifadəsidir. Respublikamızda bu partiyaya rəqib ola biləcək hər hansı bir siyasi qüvvə mövcud deyil. Yeni Azərbaycan Partiyası, sözün əsl mənasında, ümumxalq partiyasına çevrilib. Cəmiyyətimizin bütün təbəqələri partiyada vahid siyasi qüvvə kimi birləşib. Qazanılan uğurlar yeni nailiyyətlər üçün əlavə stimul yaradır. Xalq-iqtidar vəhdəti ilə sabitlik qorunur. 23 dekabrda keçiriləcək bələdiyyə seçkilərində YAP-ın namizədlərinə göstəriləcək etimad, eyni zamanda bu inkişafın davamına dəstək deməkdir.
Seçicilər bildirdilər ki, son illərdə, xüsusilə cari ilin əvvəlindən başlayaraq həyata keçirilən sosial islahatların, gənclər siyasətinin müsbət nəticələri ölkə vətəndaşlarının rifahını yaxşılaşdırıb. Gənclərin dövlət qulluğuna irəli çəkilməsi təhsil işçilərinin də qarşısında mühüm vəzifələr qoyur. Buna görə də seçicilər yekdilliklə YAP-ın namizədlərinə etimad göstərəcək, Ulu Öndərin ideyalarına, Prezident İlham Əliyevin xalqa xoşbəxtlik firavan həyat bəxş edən siyasətinə səs verəcəyik.
Xuraman İsmayılqızı, “İki sahil”