08 noyabr 2019 18:38
95

YAP Nizami rayon təşkilatı imzatoplama kampaniyası uğurla başa çatdırıb

23 dekabr 2019-cu ildə keçiriləcək bələdiyyə seçkiləri ilə əlaqədar Yeni Azərbaycan Partiyasının namizədlərinin müdafiəsi üçün Nizami rayonunda imzatoplama kampaniyası keçirilib.

Kampaniyadan öncə imzatoplayan fəallara treninq keçirilib. İmza toplamanın qaydaları bir daha izah edilib, müvafiq təlimat və tapşırıqlar verilib.

Yeni Azərbaycan Partiyasının seçki qərargahının Nizami rayon şöbəsinin fəalları rayonda yerləşən 24 saylı Nizami I, 25 saylı Nizami II və 18 saylı Nərimanov-Nizami seçki dairələri - Nizami və Keşlə bələdiyyələri üzrə namizədlikləri irəli sürülmüş 34 nəfər üçün müvafiq olaraq tələb olunan sayda imza toplayıblar.

Yüksək aktivlik şəraitində baş tutan prosesdə Yeni Azərbaycan Partiyasının seçki qərargahının Nizami rayon şöbəsinin 30-a yaxın fəalı iştirak edib. Hər bir fəal imza vərəqəsini doldurmaq üçün dairə hüdudları üzrə sakinlərlə görüşüb, eyni zamanda, rayon təşkilatının qərargahında da imza yığıblar.

Yeni Azərbaycan Partiyasının seçki qərargahının Nizami rayon şöbəsinin sədri Sədaqət Vəliyeva imzatoplama kampaniyası ilə əlaqədar bildirib ki, seçicilər kütləvi şəkildə Yeni Azərbaycan Partiyasının namizədlərinin müdafiəsi üçün imzalarını verərkən dövlətimizin başçısının siyasətini dəstəklədiklərini və seçkilərdə onlara səs verəcəklərini də deyiblər.

Qeyd edək ki, 18 saylı Nərimanov-Nizami Seçki Dairəsi ərazisində (Nizami rayonu üzrə) 22 min nəfərdən çox, 24 saylı Nizami I Seçki Dairəsi ərazisində 40 min nəfərə qədər, 25 saylı Nizami II Seçki Dairəsi ərazisində isə 46 min nəfərədək seçici qeydiyyatdadır.