İyunun 27-də Bakıda Azərbaycan Turizm Agentlikləri Assosiasiyasının ilk assambleyası keçirilib. Tədbirdə çıxış edən Dövlət Turizm Agentliyinin sədri Fuad Nağıyev Turizm Agentlikləri Assosiasiyasının fəaliyyətə başlamasının formalaşan turizm sənayesinin inkişafı istiqamətində atılan vacib addımlardan biri olduğunu qeyd edib: “Hər kəs turizmin ölkə iqtisadiyyatının prioritet istiqamətlərindən birinə çevrilməsi üçün çalışır. Son illər bu sahədə xeyli işlər görülüb. Mövcud problemlərin aradan qaldırılması, turizmin inkişaf etdirilməsi kimi məsuliyyətli vəzifə Dövlət Turizm Agentliyinin üzərindədir. Turizm kompleks xidmət sahəsidir, inkişafı da xidmət sferasının keyfiyyətindən və inkişaf səviyyəsindən asılıdır. İnanırıq ki, yeni yaradılan Azərbaycan Turizm Agentlikləri Assosasiyası mövcud potensialı inkişaf etdirmək, xidmət sahəsinin keyfiyyətini artırmaq üçün bu sahənin nümayəndələrini bir araya toplayan güclü platforma rolunu oynayacaq. Müəyyən problemlər də mövcuddur və bunların həlli istiqamətində işlər görülür.”

F.Nağıyev bildirib ki, yeni yaradılan Assosiasiyanın fəaliyyətinin əsas məqsədi turizm agentliklərini bir araya gətirərək mövcud potensialı inkişaf etdirməkdir. Turizmdə xidmət səviyyəsinin keyfiyyətinin ən vacib amillərdən biri olduğunu vurğulayan Fuad Nağıyev Assosiasiyaya fəaliyyətində uğurlar arzulayıb.

Azərbaycan Turizm Bürosunun baş icraçı direktoru Florian Zenqstşmid tədbirdə çıxış edərək turizm sənayesinin təşkilatlanmasının ümumi hədəflərə çatmaq üçün xüsusi əhəmiyyət kəsb etdiyini, Azərbaycan Hotel Assosiasiyasının və Azərbaycan Bələdçilər Assosiasiyasının, həmçinin Azərbaycan Turizm Agentlikləri Assosiasiyasının yaradılmasının bu istiqamətdə atılmış uğurlu addımlardan olduğunu bildirib.

Azərbaycan Turizm Agentlikləri Assosiasiyasının sədri Rüfət Hacıyev təşkilatın turizm agentliklərinin maraqlarını təmsil edərək dövlət-özəl sektor əməkdaşlığının təşviqinə xidmət edəcəyini qeyd edib, görüləcək işlər, məqsədlər və gələcək fəaliyyət haqqında məlumat verib.

Tədbirin sonunda Dövlət Turizm Agentliyinin və Azərbaycan Turizm Bürosunun rəhbər şəxləri turizm agentlikləri və sahibkarları maraqlandıran sualları cavablandırıblar.

Azərbaycan Turizm Agentlikləri Assosiasiyası ölkədə turizm agentliklərinin fəliyyətinə dəstək olmaq, mövcud çatışmazlıqları aradan qaldıraraq birgə inkişafa nail olmaq və əməkdaşlıq imkanlarını genişləndirmək məqsədi daşıyır.

Orxan Vahidoğlu, “İki sahil”