Gecə qəlyanaltı etmədən əvvəl iki dəfə düşünün, çünki bəzən qidalar yuxu rejimizi pozaraq, kabuslara səbəb ola bilər. Bu yazıda kabuslara səbəb olan qidalar haqqında topladığımız maraqlı məlumatları təqdim edirik.
Acılı souslar
1992-ci ildə Avstraliyadakı Tasmaniya Universitetində aparılan bir araşdırma nəticəsində məlum olub ki, yatmazdan öncə acılı souslardan istifadə edən insanların yuxuya getmələri pisləşir və onlar kabuslardan əziyyət çəkirlər. Alimlər bunu həmin qidaların bədənin hərarətini dəyişdirə biləcəyi və bunun da xəyalların formalaşmasına təsir göstərməsi ilə izah edirlər.
Şirniyyat
Sən demə şəkər artıq çəki, ürək xəstəliyi, diabet riskini artırmaqla yanaşı, kabuslara da səbəb olur.
Kanadanın Montreal və Edmont universitetlərində çalışan alimlərin apardıqları araşdırmada iştirak edən insanların 31 % -i gecə şirniyyat yedikdən sonra kabuslar və qəribə yuxular gördüklərini təstiqləyiblər. Alimlərin sözlərinə görə, bunun əsas səbəbi isə REM yuxu fazasına mənfi təsir göstərən şəkərdir. Buna görə də alimlər yatmadan 5-6 saat əvvəl şirniyyat yeməmək məsləhət görürlər.
Çipsi və digər yağlı qəlyanaltılar
Kolumbiya Universiteti və Nyu-Yorkun Düzgün Bəslənmə Mərkəzinin alimləri çipsi və yağla zəngin olan bu tipli digər qidaların yuxu pozğunluğuna və ya kabuslara səbəb ola biləcəyini aşkar ediblər. Onların sözlərinə görə, bu qida növlərində yuxu pozğunluğuna səbəb olan monosodyum glutamat maddəsi mövcuddur.
İdeal olaraq axşam yeməyiniz yüngül və təzə tərəvəz və ya yağsız ətdən ibarət olmalıdır. Gecələr maqneziumla zəngin qidalar da istehlak edə bilərsiniz ki, çünki həmin qidalar yuxunuza da müsbət təsir edəcək.
Qazlı içkilər
Soda, xüsusilə də tərkibində şəkər və kofein olan içkilər yuxunuz üçün zərərlidir. Əgər şəkər, daha əvvəl qey etdiyimiz kimi, ilk yuxu mərhələsinə təsir edirsə, kofein isə öz növbəsində yuxu zamanı da beyni stimullaşdırır və bu da xoşagəlməz yuxulara səbəb ola bilər.
Bunun qarşısını almaq üçün yatmazdan 4-8 saat əvvəl kofeinli içkilər içməmək məsləhətdir.
Samirə Tağıyeva, "İki sahil"
