Fevralın 26-da İsrailin Akko şəhərində fəaliyyət göstərən Azərbaycan Yəhudilərinin koordinasiya mərkəzi olan "İsraildə Azərbaycan Evi"nin və Ümumİsrail Dağ Yəhudiləri Birliyinin təşkilatçılığı ilə "İsraildə Azərbaycan Evi"ndə "Xocalıya Ədalət" adlı anım tədbiri keçirilib. Anım tədbirinə çox sayda insan qatılıb. Vaxtilə Azərbaycandan İsrailə köçmüş və hazırda İsrailin müxtəlif yerlərində yaşayan azərbaycanlı Yəhudilərlə bərabər‚ azərbaycanlı olmayan Yəhudilər‚ bir neçə təşkilat nümayəndələri və həmçinin media mənsubları da iştirak ediblər. Tədbirə İsrail Müdafiə Nazirliyindən də yüksək rütbəli şəxslər‚ həmçinin İsrail Mədəniyyət Evlərinin icraçı direktoru Ayala Sivan Ben Yosef‚ Tirat ha Karmel şəhərindən Galina Danilova‚ Migdalaimik şəhərinin sədri Dalya Şamilov‚ Karmiel şəhərinin sədri Nadejda Zülfügarova‚ tanınmış beynəlxalq jurnalist Xana Rafael və bir çox önəmli simalar da qatılıblar.
Tədbirdə ilk öncə Xocalı soyqırımı qurbanlarının xatirəsi bir dəqiqəlik sükutla yad edilib. Sonra iştirakçılara Xocalı soyqırımı haqqında geniş məlumat verilib. 1992-ci ilin Fevralın 25-dən 26-na keçən gecə erməni silahlı qüvvələrinin Xocalıda əliyalın dinc sakinlərə divan tutmasından və Xocalı sakinlərinin bütünlüklə amansızcasına qətl edilməsindən danışılıb və erməni vəhşiliyi və erməni cinayətləri diqqətə çatdırılıb.Tədbiri giriş sözü ilə açan "İsraildə Azərbaycan Evi"nin rəhbəri Nexemiya Şirin Mixaeli Xocalıda baş verən barbarlıq və soyqırımı aktından danışaraq bu vəhşətin dəhşətli terror və hərbi cinayət olduğunu bildirib. Həmçinin o‚ əlavə edib ki‚ Xocalı soyqırımını törədən canilər hələ də cəzalandırılmayıb. Xocalıda azərbaycanlıların başına gətirilən amansız qətliamdan və məşəqqətlərdən geniş danışan Nexemiya Şirin Mixaeli qeyd edib ki‚ Xocalıda Azərbaycanlılara qarşı törədilmiş qeyri-insani və qorxunc barbarlıq aktı ermənilərin etnik təmizləmə siyasətinin nəticəsidir. O‚ bildirib ki‚ Yəhudi xalqı ilə Azərbaycan xalqı dost və qardaş xalqdır və Yəhudi xalqı hər zaman Azərbaycan xalqının və dövlətinin yanındadır.
Nexemiya Şirin Mixaeli əlavə edib ki‚ İsrail dövləti ilə Azərbaycan dövlətinin dostluq münasibətləri bundan sonra daha da möhkəmlənəcəkdir.
Tədbirdə daha sonra çıxış edən Ümumİsrail Dağ Yəhudiləri Birliyinin sədri Pavel Elizarov Xocalıda günahsız və əliyalın dinc sakinlərin məruz qaldığı erməni terrorunu və erməni vəhşiliyini şiddətlə pisləyərək‚ Ümumİsrail Dağ Yəhudilərinin hər zaman Azərbaycan xalqının yanında olduğunu bildirib. Daha sonra çıxış edən digər qonaqlar da‚ Nofa Galil şəhərinin cəmiyyət sədri Amir Xanox‚ İsrail Müdafiə Nazirliyinin yüksək rütbəli zabitləri Elişa Xanukayev və Rafael Agaronov və digər şəxslər erməni vəhşiliyini şiddətlə pisləyərək dünyanın bu vəhşəti görməsi və tanıması üçün beynəlxalq ictimaiyyətə çağırışlar səsləndiriblər. Tədbirdə çıxış edənlər yekdilliklə bildirib ki‚ dünya ictimaiyyəti və beynəlxalq hüquqi təşkilatlar erməni silahlı qüvvələri tərəfindən Xocalıda törədilən hərbi cinayətlərə hüquqi qiymət verməlidir.
Birinci Qarabag müharibəsi zamanı erməni işğalçıları ilə döyüşlərdə itgin düşən və 30 ildir haqqında heçbir məlumat əldə olunmayan yahudi əsilli Vügar Mikalovudanın və Azərbaycan Respublikasının Yəhudi əsilli Milli Qəhrəmanı Albert Aqarunovun xatirəsi də yad edilib. Həmçinin birinci Qarabağ müharibəsi zamanı itgin düşmüş Vüqar Mikalavudanın yenidən axtarılması üçün xahişlər səsləndirildi.
Tədbirdə Xocalı soyqırımını əks etdirən foto sərgi və erməni vəhşiliyindən bəhs edən videoçarx da nümayiş etdirilib və Xocalı şəhidlərinin ruhlarına dualar oxunub.
