Parisin siyasətinin əsasını riyakarlıq və ədalətsiz yanaşma təşkil edir 

Ermənistan rəhbərliyi  özünə yeni himayədarlar axtarır ona görə də bunlar  müxtəlif ölkələrə səfərlər edirlər, onlarla əlaqələr qurmaq istəyirlər. Bunlar üçün əsas prioritet  Fransadır. Fransanın da marağındadır ki, bu bölgədən Rusiyanı sıxışdırsın, onun yerini tutsun. Bu məqsədlə də əlaqələr gücləndirilir, silah  alqı-satqısı və digər  məsələlər  Fransa və Ermənistan arasında münasibətlərin intensivləşdiyini göstərir. Ermənistan baş Nazirinin Fransa səfəri də Fransa ilə əlaqələri  daha da gücləndirmək  məqsədi daşıyır.  Ona görə də bu  səfərdən başqa bir  şey gözləmək olmaz. Fransanın istəyi  reallaşmayacaq bu  səbəbdən ki, Fransa  bu bölgədən xeyli uzaq, bölgəyə aid olmayan ölkədir. Bu bölgədə daha güclü təsir gücünə malik olan ölkələr var. Misal üçün  Türkiyə, Rusiya, İran kimi ölkələr.

Bu fikirləri “İki sahil”ə açıqlamasnda Böyük Azərbaycan Partiyasının sədri Elşad Musayev bildirib.

Elşad Musayev qeyd edib ki, Fransanın yanaşması ədalətli  yanaşma deyil. Demokratiyanın beşiyi kimi Qərb özünü göstərsə də Fransanın Ermənistan-Azərbaycan məsələsinə münasibətində ikili standartlar mövqeyindən çıxış  edir. Burada riyakarlıq və ədalətsiz yanaşma əsas meyar təşkil edir. Fransanın hansı mövqe tutmasından asılı  olmayaraq Azərbaycan öz gücü ilə istəyinə  nail oldu, ərazi bütövlüyünü, suverenliyini tam bərpa etdi. Aydın görünür ki, Fransa sülh yaratmaq istəmir, sadəcə sülhə mane olmaq istəyir. Bu məqsədlə də buraya xüsusi missiya nümayəndələri göndərib. Onlar əslinə baxanda  xüsusi  xidmət orqanlarının əməkdaşlarıdır. Onlar da burada sülh yaratmağa gəlməyib. Eyni zamanda , Fransanın, Almaniyanın və digər Avropa  İttifaqına daxil olan ölkələrin əsas məqsədi ondan ibarətdir ki, Zəngəzur dəhlizi açılmasın. Bu baxımdan da onlar basqı və müəyyən təzyiq təşkil etmək  istəyirlər.

Elşad Musayev bildirib ki, Fransanın İsrailə və HƏMAS-a münasibəti də ədalətsizdir.  Fransa HƏMAS-a qarşı koalisiya formalaşdırmaq istəyirdi, amma indi İsrailin üzərinə gedir. Bu onu göstərir ki, Makronun həm daxili, həm xarici siyasətində ciddi anlaşılmazlıq var.

Yaqut Ağaşahqızı, “İki sahil”