İsveçrə Teleradiosunun (SRF) əsas xəbər buraxılışında Azərbaycan və Ermənistan arasında gedən sülh danışıqları və yaxın gələcəkdə regionda əmin-amanlığın tam bərqərar olmasına dair geniş reportaj yayımlanıb.
“İki sahil” xəbər verir ki, “Cənubi Qafqazda tezliklə sülh olacaqmı?” sərlövhəli reportajda 30 il davam edən münaqişə və müharibələrdən sonra Cənubi Qafqazın 2024-cü ildə sülh və əmin-amanlığa ümidlə baxdığı ifadə olunub. Teleaparıcı Azərbaycana səfər etmiş çəkiliş heyətinin reportajından öncə bildirib ki, ötən ilin sentyabr ayında Azərbaycan uğrunda uzun müddət mübarizə gedən Qarabağ üzərində nəzarətini qəti olaraq bərqərar etdikdən sonra, Azərbaycan və Ermənistan arasında sərhəd və yaşayış məntəqələri ilə bağlı aparılan danışıqlarda aşkar şəkildə yaxınlaşma müşahidə olunur. Diqqətə çatdırılıb ki, Qarabağda yaşayan ermənilər ərazini tərk etdikdən sonra hazırda aparılan sülh danışıqları yeni yaranmış güc nisbətini təsbit etməlidir.
Reportajın ilk kadrları isə böyük tikinti meydançasını xatırladan Füzuli şəhərindən başlayır. Aparıcı Filipp Zahn bildirir ki, 30 il xarabalıqlar içində qalan Füzulidə bu gün həyat yenidən qaynamaqdadır. Birinci Qarabağ müharibəsi zamanı 1993-cü ildə buranı işğal edən və bütün azərbaycanlıları qovan Ermənistan üç il bundan əvvəl baş vermiş və böyük itkilər tələb edən müharibədə bu ərazilərdən geri çəkilməli oldu.
Reportajda quruculuq işlərinin çətinləşdirən amillər, xüsusilə də ərazilərin minalardan çirklənməsi probleminə də toxunulub. Bildirilib ki, minalar problemi bərpa və quruculuq işlərini çətinləşdirir, lakin indiyədək Füzulinin 30 faizi minalardan təmizlənib və bu istiqamətdə fəaliyyət yüksək templə davam etdirilir. Azərbaycan hökuməti qısa müddət ərzində bu şəhərdə minədək mənzil inşa edib və hər ay öz yurdlarına geri dönən azərbaycanlı ailələrə mənzillərin açarları təqdim olunur. Bununla da Azərbaycanın verdiyi mesaj tam aydındır: nə Füzulidə, nə də Qarabağın başqa ərazilərində Ermənistan həmişəlik olaraq ərazi iddiaları ilə çıxış edə bilməz. Eyni zamanda erməniəsilli əhali Azərbaycan vətəndaşlığını qəbul etmək şərti altında yenidən həmin ərazilərə qayıdıb yaşaya bilərlər.
Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev SRF üçün müsahibəsində bildirib ki, Azərbaycanın istəyi bütün Cənubi Qafqazın mənzərəsini dəyişməkdir: “Bu regionun adı gələcəkdə müharibə və münaqişələrlə deyil, şanslar, işgüzar əlaqələr, inkişaf və rifahla bağlı hallanmalıdır”.
Aparıcı qeyd edir ki, Bakıda Azərbaycan Prezidentinin Administrasiyasında yüksək səviyyədə özünəinam hökm sürür, çünki Xəzər dənizi sahilində yerləşən bu metropol bütün regionun iqtisadi mühərrikidir. Rusiyaya qarşı tətbiq edilən embarqolardan sonra isə zəngin neft və qaz ehtiyatlarına malik Azərbaycan Avropa üçün vazkeçilməz tərəfdaşa çevrilib.
Reportajda Azərbaycan dövlət başçısı İlham Əliyevin ötən il oktyabrın 15-də Xankəndi şəhərində Azərbaycan dövlət bayrağını ucaltdığı kadrlara da yer verilib. Bildirilib ki, Qarabağda Azərbaycan dövlət bayrağını ucaldan Azərbaycan Prezidenti İlham Əliyevin güclü müttəfiqləri vardır və onların arasında Azərbaycanı illərdən bəri hərbi və geosiyasi müstəvilərdə dəstəkləyən Türkiyə xüsusi yer tutur.
