Prezident İlham Əliyevin və Prezident Rəcəb Tayyip Ərdoğanın liderliyi ilı Azərbaycan və Türkiyə arasında müttəfiqliq daha da güclənəcək

Azərbaycan-Türkiyə dövlətləri arasında qardaşlıq, dostluq və sıx əməkdaşlıq münasibətləri özünün ən yüksək səviyyəsindədir. Bu iki dövlət arasındakı münasibətlər tarixin sınağından keçmiş, heç bir qüvvə bu birliyi poza bilməmişdir. Əksinə, hər iki dövlət və millət şərəflə Ulu Öndər Heydər Əliyevin "Bir millət, iki dövlət" tarixi sözlərini həqiqətini dünyaya nümayiş etdirirlər. Azərbaycan və Türkiyə arasında əlaqələrin inkişafı təkcə bu dövlətlərin yox, həm də regionun ümumi tərəqqisinə, sabitliyin bərqərar olmasına mühüm töhfələr verir. Tarixin ən çətin anlarında belə bu iki ölkə arasındakı qardaşlıq sözdə deyil, əməldə özünü göstərib.

Bu fikirləri “İki sahil”ə açıqlamasında politoloq Anar Əliyev deyib.

A.Əliyev qeyd edib ki, Türkiyə qardaş ölkə kimi keçmiş Qarabağ münaqişəsinin davam etdiyi üç onillik ərzində həmişə Azərbaycana dəstək verib: “Biz Türkiyənin qətiyyətli dəstəyini 44 günlük Vətən müharibəsi zamanı bir daha gördük. Müharibənin ilk günlərindən başda qardaş ölkənin Prezidenti Rəcəb Tayyib Ərdoğan olmaqla bütün yüksək səviyyəli rəsmilər Türkiyənin Azərbaycanın yanında olduğunu bildirən bəyanatlarla çıxış etdilər. Türkiyənin bu mənəvi-siyasi dəstəyi Azərbaycanın özünəinam hissini artırdı. Postmüharibə mərhələsində də qardaş Türkiyə Azərbaycanın işğaldan azad edilmiş ərazilərdə start verdiyi genişmiqyaslı bərpa işlərində yaxından iştirak edir.  Azərbaycan dövləti də öz növbəsində Türkiyənin qarşılaşdığı bütün çətin məqamlarda ona hər cür dəstək və yardım göstərir, bütün çətin zamanlarda  qardaşının köməyinə çatan ilk ölkə olur”.

Hər iki ölkənin siyasi rəhbərliyi indiki şəraitdə prinsipial mövqe nümayiş etdirirlər

Politoloq qeyd edib ki, Türkiyə-Azərbaycan birliyi bu gün regionda sabitləşdirici amildir: “Azərbaycan və Türkiyə bölgədə və dünyada gedən proseslərə münasibətdə həmişə eyni mövqe sərgiləmiş, eyni milli maraqlardan çıxış etmişlər. Dünya siyasi düzəninin indiki şəraitində isə hər iki ölkənin bölgədə və dünyada gedən proseslərə vahid prizmadan yanaşmaları, bir-birlərinin maraqlarını müdafiə etmələri daha mühüm əhəmiyyət kəsb edir. Təqdirəlayiq haldır ki, hər iki ölkənin siyasi rəhbərliyi indiki şəraitdə daha prinsipial mövqe nümayiş etdirirlər”.

A.Əliyev qeyd edib ki, Prezident İlham Əliyevin fevralın 19 da Türkiyəyə rəsmi səfəri onu göstərir ki, Azərbaycan və Türkiyə yeni hədəflərə birlikdə çatacaqlar: “Ankarada Prezident İlham Əliyevin və Prezident Rəcəb Tayyib Ərdoğanın iştirakı ilə Azərbaycan-Türkiyə sənədlərinin imzalanması mərasimi olub. “Azərbaycan Respublikası və Türkiyə Respublikası arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında Saziş”i Azərbaycanın iqtisadiyyat naziri Mikayıl Cabbarov və Türkiyənin xəzinə və maliyyə naziri Mehmet Şimşek tərəfindən imzalanıb. Bu sazişlə ikiqat vergitutma aradan qaldırılır. Görünən odur ki, bundan sonra  Prezident İlham Əliyevin və Prezident Rəcəb Tayyip Ərdoğanın səyləri nəticəsində Azırbaycan və Türkiyə arasında müttəfiqliq, strateji tərəfdaşlıq, güclü iqtisadi, mədəni əlaqələr daha da genişlənəcək.

Nigar Orucova, “İki sahil”