Öz biznesini açıb, mümkün qədər uzun müddət uğurlu olmasını, özünü dolandırmağı və sonra övladlarına miras qalmasını istəməyən insan yoxdur. Real həyatda bu, həmişə baş vermir, lakin bəzi insanlar var ki, bu barədə həqiqətən də şanslıdırlar. Bu gün dünyada bir çox şirkətlər var ki, onların xidmətlərindən və ya məhsullarından bir çox insan nəsilləri istifadə edib və edir, onlar hələ də gəlir gətirirlər. Tarixi əsrlərə gedib çıxan 10 uzunömürlü şirkəti aşağıda təqdim edirik:

“Sotheby's”

Ən məşhur və nüfuzlu beynəlxalq auksion evlərindən biri olan “Sotheby's” uzun müddətdir ki, qiymətli əşyalar satmaq üçün bazardadır. Bu şirkətin tarixi düz 280 il əvvələ gedib çıxır. 1744-cü ildə britaniyalı Samuel Baker bu marka altında müxtəlif nadir kitabları hərraca çıxarmağa başlayıb. Uzun illər boyunca müəssisənin uğuru yalnız artdı və sənət əsərlərinin, əntiq əşyaların və digər lüks əşyaların satışı üçün hərraclara çevrildi.

“Admiralty” tərsanələri

Uzunömürlü müəssisələrin ən məşhur nümunəsi Rusiyanın qüdrətini yaradan və gücləndirən Sankt-Peterburq müəssisəsi olan “Admiralty” tərsanəsidir. Üç əsrdən çox yaşı olan hərbi donanma orada yerləşir. Bu Rusiya gəmiqayırma müəssisəsi bu il yubileyini qeyd edir - 320 il və o vaxtdan bəri o, heç vaxt yüksək standartını itirməyib, hələ də Rusiya Hərbi Dəniz Qüvvələri ilə fəal əməkdaşlıq edir və mülki gəmilər üçün layihələr hazırlayır.

“Twinings”

Ənənəvi formada ingilis çayı özlüyündə Britaniya Birləşmiş Krallığının brendidir. Bununla belə, onun öz simvolik şirkətləri də var ki, bu şirkətlər uzun illər Böyük Britaniya sakinlərinə ənənəvi “Fife-o-Clock” zamanı özlərini keyfiyyətli içki ilə “təmin etməyə” imkan verir. Onların arasında əsl rekordçu “Twinings” şirkətidir. Şirkət 1706-cı ildə qurulub və o vaxtdan bəri fəaliyyətini davam etdirir. Bundan əlavə, “Twinings” brendinin özü də ənənələrə hörmət və qorunma modeli hesab oluna bilər: şirkət indiyədək nəinki loqosunda dəyişiklik etməyib, hətta istehsal yerini də heç vaxt dəyişməyib.

“Royal Delft”

Keçən il daha bir uzunömürlü şirkət “Royal Delft” yubileyini qeyd etdi. Onun işi yalnız əl istehsalı keramika qablar yaratmaqdır. Şirkət bu işə 371 il əvvəl başlayıb. Bu uzun müddət ərzində şirkət təkcə tarixi ilə deyil, həm də keramika məmulatlarının yaradılması ənənəsində öz izini qoyması ilə seçilib. Məlum olub ki, əsrlər boyu öz adını qoruyub saxlayan mavi və ağ rəng sxemində qab-qacaqların populyarlaşmasının başlanğıcında məhz “Royal Delft” dizaynerlərinin əməyi olub. Ən maraqlısı odur ki, şirkət heç vaxt özünü sənaye istehsalına yönəltmək niyyətində olmayıb, çünki sırf əl işləri sahəsi olmasını özünün  uzunmüddətli uğurunun açarı hesab edir.

“Grolsch”

Pivə həvəskarları tez-tez köpüklü içki bazarında daha uzun müddət qalmış istehsalçılara diqqət yetirirlər. Ancaq “Grolsch”dan daha məşhur uzunömürlü bir marka tapmaq olduqca çətin olacaq. 410 illik tarixi olan şirkətin pivəsi bu illər ərzində heç də keyfiyyətini itirməyib, əksinə daha çox sevilib. Təəssüf ki, şirkət müstəqil qala bilməyib, “novate.ru” saytının redaktor heyətinə görə, şirkət çoxdan başqa bir pivə nəhənginin törəmə şirkəti statusundadır, lakin “Grolsch” adı hələ də populyardır, çünki bu, yüksək standartlarla və əla dadla əlaqələndirilir.

“Zildjian”

Bəzilərinə elə gələ bilər ki, nağara dəstləri çoxdan mövcud deyil, musiqi alətlərinin də uzun tarixi yoxdur. Ancaq əslində bu heç də belə deyil - sadəcə “Zildjian” adlı məşhur markaya baxın. Onun “Rolling Stones” və “Beatles” kimi əfsanəvi qrupların musiqiçiləri tərəfindən istifadə edilən məhsulları 401 ildir ki, bazardadır. Üstəlik, şirkətin Türkiyənin İstanbul şəhərində yarandığını çox az adam bilir, lakin istehsalın sonradan Amerikaya köçürülməsi məhsulların yüksək keyfiyyətini qoruyub saxlamağa və bu günə qədər davam edən qlobal populyarlıq qazanmağa imkan verdi.

“Bushmills”

İnsanlar minlərlə ildir müxtəlif spirtli  içkilər içirlər və buna görə də onların istehsalı çoxdan məlumdur. Onların arasında çox sayda uzunömürlülər də var. Lakin rekordçu planetin ən qədim içki zavodunun fəxri statusuna malik “Bushmills” şirkətidir. Hər şey 1608-ci ildə İngiltərə kralı I Ceymsin Tomas Filip adlı şəxsə Şimali İrlandiyanın Antrim qraflığında dərəcə ilə içkilər istehsal etmək icazəsi verməsi ilə başladı. Uzun tarixi ərzində “Bushmills” bir çox keyfiyyətli spirtli içkilər hazırlamışdır, lakin ən məşhuru -"İrlandiya Balının ləzzəti" içkisi artıq şirkətin simvollarından biridir.

Moskva Dövlət Universitetinin nəşriyyatı

Adətən, təhsil müəssisələri istehsalın və biznesin çoxəsrlik tarixi ilə əlaqələndirilmir. Ancaq bu, tamamilə doğru deyil, çünki kifayət qədər spesifik olan elmi ədəbiyyatın hardasa çap olunmasına ehtiyac var və bu məsələdə ən səriştəli olanlar, şübhəsiz ki, akademiklərin özləri olacaq. Buna görə də, bir sıra dünya universitetlərinin bunun üçün öz imkanları olur - məsələn, Rusiyada ən böyüyü Moskva Dövlət Universitetinin Nəşriyyatıdır. O, həm də ən qədim olmaq hüququna malikdir, çünki orada elmi və tədris ədəbiyyatı hələ 1756-cı ildə çap olunmağa başlamışdır. Moskva Dövlət Universitetinin Nəşriyyatı bu gün də yüksək statusunu itirmir, görkəmli alimlərin müxtəlif elmi fənlər üzrə nəşrlərini dərc etməyə davam edir.

“Beretta”

Bu silah şirkəti də dünyanın ən uzunömürlü şirkətləri siyahısındadır. Bu, təəccüblü deyil, çünki insanlar tarix boyu hücuma keçib və özlərini müdafiə ediblər və bu məqsədlər üçün nəzərdə tutulmuş yüksək keyfiyyətli alətlərin istehsalçılarına həmişə ehtiyac olub. Nəinki uzun tarixə malik, həm də bütün dünyada məşhur olan şirkətlər arasında hələ 1526-cı ildə ailə biznesi kimi əsası qoyulmuş “Beretta” brendini xüsusi vurğulamağa dəyər. Bir neçə il sonra 500 illik yubileyini qeyd edəcək müəssisə, şübhəsiz ki, hələ də məşhurdur və planetin ən böyük silah tədarükçüləri arasında qalmağa davam edir.

“Affligem Abbey” pivə zavodu

Heyrətamiz dərəcədə uzun müddət populyarlığını qoruyan başqa bir pivə markası Belçikanın “Affligem Abbey” pivə zavodudur. Onun tarixi insanı həqiqətən heyrətləndirir, çünki bu ad altında ilk istehsal 1074-cü ildə olub. Üstəlik, bazarda xüsusi çeşidi hələ də dəyərləndirilən unikal pivə reseptinin yaradıcıları abbatlıqda yaşayıb-yaratmış rahiblərdir - əslində istehsal yeri markanın adında da əks olunub. Bu pivə zavodu iyirmi il əvvəl “Heineken” şirkəti ilə birləşib və artıq müstəqil bir qurum deyil. Ancaq orada ənənələrə açıq şəkildə hörmət edilir: “Affligem Abbey Brewery” brendi qorunub saxlanılıb, orijinal istehsal yeri dəyişməyib və orta əsr rahiblərinin ixtira etdiyi pivə hələ də bütün dünyada aktiv şəkildə alınır.

Nubar Süleymanova, “İki sahil”