Xəyallar dünyası inanılmaz dərəcədə müxtəlifdir. Orada arzuların səbəb olduğu yaxşı röyalar üçün ayrı bir yer və qorxulu yuxular üçün isə ayrı bir yer var.Ancaq xoş bir yuxunun süjeti, bir qayda olaraq, gözlənilməz və fərqli olur, dəhşətli və qorxulu yuxular isə demək olar ki, hər kəsdə oxşar olur.

Yuxuda təqib edilmək

Bu, bir çox insanın gördüyü, həmişə mövcud olan kabusdur. Gündüz qorxu və narahatlıqlarının kabusa çevrilməsi və yuxuda insanı təqib etməyə başlaması, narahatlığın açıq əlamətidir. Təqib yuxusu həm də hər hansı pis vərdişlərdən, xoşagəlməz keyfiyyətlərdən və ya komplekslərdən xilas olmaq istəyini ifadə edə bilər. Yuxuda "düşmən”in öhdəsindən gəlməyə çalışmaq real həyatda çətinliklərlə qarşılaşdıqda necə davranacağını göstərə bilər.

Dişlərin düşməsi və ya ovularaq tökülməsi

Yuxuda dişləri tökülən insan əslində üzərinə düşən vəzifələrin öhdəsindən gələ bilməyəcəyini hiss edir və ya həyatını düzgün istiqamətə yönəldə bilmədiyini anlayır. Həmçinin, dişlərin tökülməsi ilə bağlı kabuslar cəmiyyətdəki etibarsızlığı və ya bir şeydə bacarıqsızlığı aşkar etmək qorxusunu simvollaşdıra bilər.

Hündürlükdən yıxılmaq

Hündürlükdən düşmə haqqında bir yuxu bir insanın daxili narahatlığını, vəziyyətə nəzarəti itirmək qorxusunu göstərir. Bu cür kabuslar yüksəklikdən qorxanların da başına gələ bilər, lakin onlar müntəzəm olaraq öz fobiyaları ilə üz-üzə durmağa məcbur olurlar. Alimlərin nöqteyi-nəzərindən yuxuda hündür bir yerdən yıxılmaq “hipnaqogik vəziyyətdə” olmaq deməkdir. Bu, yuxu ilə oyanıqlıq arasındakı ara vəziyyətdir, insan yıxıldığını hiss edir, lakin tezliklə oyanır və yatdığını anlayır.

Boğulmaq

Belə bir kabus ən çox məsuliyyətli insanların yuxularında olur. Onlar tamamilə öz işlərinə köklənmiş və qayğılarının içərisində itib-batmış olurlar. Ola bilsin ki, yuxuda boğulan bir insan başqalarının hörmətini, nüfuzlu bir işini və ya sosial statusunu itirməkdən çox qorxur. Alimlərin fikrincə, bu cür kabuslardan qurtulmaq üçün sadəcə həyata münasibətinizi yenidən nəzərdən keçirmək, istirahət etməyi öyrənmək və daha tez-tez xatırlamaq lazımdır ki, mükəmməl insan yoxdur və heç kim səhv etməkdən sığortalı deyil.

Xəstələnmək və ya yuxuda ölmək

Ciddi xəstəlik və ya ölümlə əlaqəli kabuslar ən çox həyatdakı dəyişiklikləri simvollaşdırır. Bir yuxuda yaşanan duyğular şiddətli əzablara səbəb olsa belə, narahat olmamalısınız.

Özünüzü ictimai yerdə çılpaq görmək

Bu “erotik” kabus adətən, insanın özünə hörmətini müəyyən etmək üçün əla vasitədir. Bu vəziyyətdə paltarlar bir növ sığınacaq rolunu oynayır. Yuxuda ictimai yerlərdə özünü çılpaq görmək bir insanın yaşadığı xəcalət, utanc və ya günahkarlıq hissinin mövcudluğuna işarə edir və zəiflik və müdafiəsizliyi göstərir.

Yuxuda itmək

Bir insan yuxuda itdiyini görürsə, özünü labirintdə tapırsa, tamamilə tanımadığı bir yerdə görürsə və doğru yolu tapa bilmirsə, real həyatda yəqin ki, buna bənzər bir şey yaşayır. Belə bir kabus hərəkətə təkan verməlidir. Ümidsizliyə təslim olmaqdansa, özünüzü anlamağa çalışmalı və düşüncələrdən hərəkətlərə keçməlisiniz. Xatırlamaq lazım olan əsas şey odur ki, hətta ümidsiz görünən vəziyyətlərdən də çıxış yolu tapmaq olar.

Fəlakətlər haqqında kabuslar

Fəlakət kabusları ən çox qabiliyyətlərindən əmin olmayan insanları müşayiət edir və real həyatda yaxınlaşan bir fəlakətin siqnalıdır. Bunlar ailə münaqişələri, işdəki problemlər, yaxınlarınızla münasibətlərdə çətinliklər ola bilər. Bu cür kabuslar gördükdə, gərgin iş qrafikinizi boşaltmağa, yarımçıq qalan işləri tez başa vurmağa və istirahət etməyi öyrənməyə çalışmalısınız.

Avadanlıqların qırılması və ya işləməməsi ilə əlaqəli kabuslar

Müasir insanlar tez-tez belə yuxular görürlər. Zəng etmək istədikdə telefonda yalnız sonsuz bip səsləri eşidirlər, e-poçt göndərmək istəyirlər, lakin birdən kompüter xarab olur. Bəzi insanlar bu cür yuxulara əhəmiyyət verməsələr də, digərləri üçün gözlənilmədən avadanlıqların sıradan çıxması əsl kabusdur. Belə yuxuların müntəzəm təkrarlanması bir insanın dostları və yaxınları ilə ünsiyyətdə problemləri olduğunu göstərir.

Uğursuz imtahanlarla bağlı kabuslar

Uğursuz imtahanlarla bağlı kabuslar hətta çoxdan təhsil müəssisəsini bitirmiş və mürəkkəb formulları, dərslikləri və esseləri artıq unutmuş insanlar tərəfindən də görülə bilər. Çox vaxt onlar öz mövqeyinə uyğun olmayan və ya dəyərini sübut etmək ehtiyacı hiss edən bir insanın təcrübələrini simvollaşdırırlar. Bəzi vacib işləri kifayət qədər yaxşı etmədiyini düşünən insanlar daha çox belə yuxular görürlər.

Nubar Süleymanova, “İki sahil”