Yeni tədqiqat qadınların qocalığı kişilərdən xeyli gec qavradığını ortaya qoyub. Bu da qocalma qavrayışlarının və onun ictimai təsirlərinin dəyişməsinə səbəb ola bilər.

Biz “rəsmi olaraq” neçə yaşda qocalırıq?

“Psychology and Aging” jurnalında dərc olunan beynəlxalq araşdırmanın nəticələrinə görə, subyektiv tərifə əsasən, qadınlar kişilərdən xeyli gec "qocalıq" hiss etdiklərini etiraf edirlər.

Berlinin Humboldt Universitetindən tədqiqat müəllifi Markus Vettstein “Deutsche Presse-Agentur”a müsahibəsində bildirib ki, orta hesabla qadınlar qocalığın başlanğıcını kişilərdən təxminən iki il yarım sonra təyin edirlər.

Bu, qadınların orta hesabla daha uzun yaşaması ilə bağlı ola bilər. Psixoloq qeyd edib ki, başqa bir izahat qadınların qocaldıqda görünüşlərinə görə kişilərə nisbətən daha çox “damğalanmasıdır”. Buna görə də, qadınlar bu mənfi görüntüdən uzaqlaşmaq üçün beyinlərində qocalığa daha yüksək baryer qoyurlar.

Humboldt Universiteti, Stanford Universiteti, Lüksemburq Universiteti və Qreyfsvald Universitetindən olan tədqiqatçılar 1911-1974-cü illər arasında anadan olmuş 14 minə yaxın insanın məlumatlarını təhlil ediblər. Əsas sual bu idi: Siz hansı yaşda olan insanı qoca kimi təsvir edərdiniz?

Vettstein və onun komandası, həmçinin müəyyən ediblər ki, bu gün böyüklər qocalığın əvvəlki onilliklərdə doğulan insanlardan daha gec başladığını hiss edirlər. Buna görə, 1955-ci il təvəllüdlü 65 yaşlı insanlarda qocalığın orta hesabla 75 yaşından başladığı kimi subyektiv təsəvvür yaranıb. Alimlərin modelinə görə, 1911-ci il təvəllüdlü 65 yaşlılar qocalığın 71 yaşından başladığını hiss ediblər.

Bu dəyişikliyə səbəb nədir?

"Bir məqam, şübhəsiz ki, son onilliklərdə orta ömür uzunluğunun artmasıdır”, -deyə Vettstein bildirib.

“Bununla belə, ABŞ, Böyük Britaniya, Fransa və Almaniya kimi son illərdə gözlənilən ömür artımının yavaşladığı ölkələrdə qocalığa daha gec başlama meyli də müvafiq olaraq yavaşlayır”-Vettstein qeyd edib.

Vettstein izah edib ki, yaşlılığın “tərifinin” dəyişdirilməsinin başqa bir səbəbi ondan ibarətdir ki, əsas göstəricilərdən biri olan təqaüdə çıxma yaşı bir çox Qərb ölkələrində illər ərzində yüksəlir.

Bundan əlavə, bu gün yaşlı insanlar keçmişə nisbətən orta hesabla daha sağlam və fit olurlar və buna görə də daha uzun müddət cavan görünürlər.

Vettsteinin sözlərinə görə, alimlər məlumatları təhlil edərkən başqa bir fenomen aşkar ediblər: “İnsan yaşlandıqca beynində qocalığın başlanğıcını bir az da geriyə itələyir.

Nubar Süleymanova, “İki sahil”