24 iyun 2024 16:10
459

Müzəffər Ordumuzla hər zaman qürur duyuruq

Azərbaycan Silahlı Qüvvələrinin yaranmasının 106 ili tamam olur. 106 illik yolun zirvəsində dayanan tarixi Zəfərimiz, ərazi bütövlüyümüzün və suverenliyimizin tam bərpa edilməsi ordu quruculuğu sahəsində qazandığımız uğurların, Azərbaycanın malik olduğu imkanların təqdimatıdır. Əbəs yerə deyilmir ki, Ordun varsa, yurdun var. Azərbaycanın bu gününü müstəqilliyinin bərpasının ilk illəri ilə müqayisə etdikdə bu fikrin təsdiqini görürük. Belə ki, müstəqilliyimizin bərpasının ilk illərində hakimiyyətsizliyin mövcudluğu digər sahələr kimi, ordu quruculuğunda da uğursuzluqlara yol açdı. Ordudan yayınma halları, fərarilik baş alıb gedirdi. Həmin illərdə Silahlı Qüvvələr torpaqlarımızın deyil, ayrı-ayrı qrupların maraqlarına xidmət edirdi. Bir tərəfdən ölkəyə rəhbərlik edənlərin səriştəsizliyi, hakimiyyət uğrunda mübarizələri, digər tərəfdən nizami ordunun olmaması ərazilərimizin işğalına səbəb oldu.

1993-cü ildə Ulu Öndər Heydər Əliyevin xalqın təkidli tələbi ilə hakimiyyətə qayıdışından sonra  bütün sahələrdə başlanan inkişaf ordu quruculuğunda da özünü göstərdi. Qısa zamanda nizami ordu formalaşdı, maddi-texniki bazası möhkəmləndirildi, əsgər və zabitlərimizin döyüş ruhu gücləndirildi. Orduda fərarilik hallarına son qoyuldu. İldən-ilə ordunun döyüş hazırlığının yüksəldilməsi, peşəkar hərbçilərin hazırlanması, hərbi hissələrdə nizam-intizamın möhkəmləndirilməsi istiqamətində görülən işlərin miqyası daha da genişləndirildi. Ümummilli Lider Heydər Əliyevin 1998-ci il 22 may tarixli Sərəncamına əsasən, 1918-ci ildə əlahiddə Azərbaycan Korpusunun yarandığı gün - 26 iyun Azərbaycan Respublikasının Silahlı Qüvvələr Günü elan olundu. Bayramlarımız sırasına daha biri əlavə edildi.

2020-ci ilədək qeyd edilən tarixi günlərdə, bayramlarda hər birimizi bir arzu, amal birləşdirirdi-Torpaqlarımız işğaldan azad edilsin, ərazi bütövlüyümüz və tarixi ədalət bərpa olunsun, soydaşlarımızın torpaq həsrətinə son qoyularaq dogma yurd-yuvalarına qayıtsınlar. Bu arzunun reallığa çevriləcəyinə böyük inam var idi. Dövlətimizin qətiyyəti, ölkəmizin bütün sahələrdə uğurlu inkişafı, öz şərəfli missiyasını uğurla yerinə yetirməyə qadir ordumuz, xalqımızın birliyi, ən əsası Qarabağ münaqişəsinin həllli üçün möhkəm hüquqi bazanın mövcudluğu bu inama əsas verirdi. 2020-ci ildə 44 günlük İkinci Qarabağ müharibəsində tarixi Zəfərimiz bu əminliyin təsdiqi oldu.

Ümummilli Lider Heydər Əliyevin siyasi kursunu bütün sahələrdə uğurla davam etdirən Prezident İlham Əliyevin ordu quruculuğu sahəsində atdığı addımların ümumiləşdirilmiş ifadəsi məhz bu gün xalqımızın Zəfər sevincini yaşaması, Azərbaycan əsgərinin, zabitinin Silahlı Qüvvələr Gününü böyük qürur hissi ilə  qeyd etməsidir.  Canları, qanları ilə tarix yazıb şəhidlik zirvəsinə ucalan Vətən oğulları 30 illin torpaq həsrətinə son qoydu, xalqımızın yenilməzliyini, məğrurluğunu dünyaya nümayiş etdirdi. Dövlət başçısı, Müzəffər Ali Baş Komandan İlham Əliyevin  rəhbərliyi ilə rəşadətli Ordumuzun yazdığı Zəfər səhifəsi  daim gənc nəsil tərəfindən vərəqlənəcək, bir daha bu reallığı həyat amalına çevirəcəklər ki, torpaq, əgər uğrunda ölən varsa Vətəndir.

Müzəffər Ali Baş Komandan İlham Əliyev 2021-ci il Silahlı Qüvvələr Günündə bildirmişdir: “İyunun 26-sı Silahlı Qüvvələr Günüdür. Bu günü biz hər il təntənə ilə qeyd edirdik. Müxtəlif tədbirlər keçirilirdi. Hər il 26 iyun tarixində hərbçilərlə görüşlər əsnasında mən deyirdim ki, gün gələcək biz öz doğma torpağımıza qayıdacağıq, ərazi bütövlüyümüzü bərpa edəcəyik. Deyirdim ki, əgər bu, danışıqlar yolu ilə mümkün olmayacaqsa, məsələni hərbi yolla həll edəcəyik. Belə də oldu. Uzun illər davam edən danışıqlar heç bir nəticə vermədi və Azərbaycan öz ərazi bütövlüyünü, tarixi ədaləti, beynəlxalq hüququ döyüş meydanında təmin etmişdir.”    

Hazırda Qarabağda və Şərqi Zəngəzurda genişmiqyaslı quruculuq işləri aparılır. Keçmiş məcburi köçkünlər öz dədə-baba torpaqlarına qayıdırlar. Zəngilan rayonunun Ağalı, Tərtər rayonunun Talış, Laçının Zabux və Sus kəndləri, Füzuli, Laçın, Şuşa və Xocalı şəhərləri sakinlərinə qovuşublar. Proses mərhələ-mərhələ davam edir. Dogma yurd-yuvalarına qayıdan keçmiş köçkünlər bu torpaqlarda müasir tələblər səviyyəsində yaradılan şəraitdən məmnunluqlarını ifadə edirlər. Dövlət başçısı İlham Əliyev bildirir ki, bu gün prioritet məsələlərdən biri ordu quruculuğu, digəri isə Qarabağ və Şərqi Zəngəzurun bərpa edilməsidir. Bundan sonra da Ordumuzun  gücləndirilməsi üçün bütün lazımi tədbirlər görüləcək.

Abil Ağasəfov,
YAP Qəbələ rayon təşkilatının sədri