Döş qəfəsində ağrı, nəfəs darlığı, aşağı qan təzyiqi kimi simptomların davamlı olaraq təkrar olunması, ürək-damar xəstəliyindən əziyyət çəkdiyinizi göstərən tipik əlamətlər ola bilər. Xəstəlik ağırlaşmazdan əvvəl erkən müayinə və müalicə lazımdır. Mütəxəssislər ürəklə bağlı diqqət göstərilməli olan əsas simptomları açıqlayıblar:

Sinə ağrısı

Bu, infarktın ən ümumi simptomudur. Lakin həmişə ani deyil, şiddətli ağrı ilə özünü büruzə verir. Bu simptom sinə içində sıxılma və ya ağırlıq kimi narahatlığa səbəb ola bilər. Xəstələr bunu ürək yanması əlaməti kimi qəbul edə bilərlər. Simptomlar bir neçə dəqiqədən çox davam edir, yox olur və sonra geri qayıdır.

Bel və ya qol ağrısı

Kişilər tez-tez sol qol nahiyəsində ağrı hiss edirlər, qadınlarda isə bel və əllərdə ağrı olur. Qol ağır və ya hərəkətsiz hiss edilə bilər. Bu, angina və ya infarkt əlaməti ola bilər.

Ağrı sinə içində başlaya bilər, sonra yuxarı və ya aşağı, arxaya yayıla bilər. Ağrı naməlum bir yerdə başlayırsa, gecələr oyanmağınıza səbəb olursa, adətən əzələ və ya oynaqda ağrı kimi hiss edilmirsə  ürək probleminiz ola bilər.

Boyun və ya çənə ağrısı

Miokard infarktı baş verdikdə xəstə yuxarı çiynində ağrı hiss edə bilər. Bir və ya hər iki tərəfdən alt çənədə ağrı və ya sıxıntı hissi olur. Boyun ağrıya və ya xəstə nəfəs almaqda çətinlik çəkə bilər.

Səbəbsiz yorğunluq

İnsanların işdən sonra yorğunluq hiss etməsi normaldır. Ancaq heç bir gərgin fəaliyyətin olmadığı bir halda qəflətən yorğunluq hiss edirsinizsə, infarkt əlaməti ola bilər.

Bayılma və ürəkbulanma

Bəzən xəstələr huşunu itirmək üzrə olduğunu hiss edirlər. Bu, qan təzyiqi aşağı düşdükdə və ürək beyinə kifayət qədər oksigen vurmadıqda baş verir. Ürəkbulanma və iştahsızlıq da bədənin ürəklə bağlı reaksiyaları ola bilər.

Tərləmə və nəfəs darlığı

İnfarkt riski olan xəstələr gərgin fəaliyyət olmadan da tərləyə bilərlər. Onlarda xüsusilə uzanıb yatmaq nəfəs almağı çətinləşdirə bilər.

Öskürək və xırıltı

Tez-tez öskürək, xırıltı və sürətli nəfəs ürək çatışmazlığının əlamətləri ola bilər. Bu, ürək bədənin ehtiyacları üçün kifayət qədər qan və oksigeni pompalamadıqda baş verir.

Ödəm

Ürək çatışmazlığı olan xəstələrdə ayaqlarda və topuqlarda ödəm ola bilər. Bu simptomlar adətən xəstə ayaqqabısının darlığından şikayətləndikdə aşkar edilir.

Qanın ürəyə qayıtması zəif olduqda qan damarlarda toplanır və interstisial toxumaya qaçır. Bu, bədən boşluqlarında mayenin yığılmasına səbəb olur. Böyrəklər bütün suyu və duzu çıxara bilmir, nəticədə ödəm artır.

Gəzməkdə çətinlik

Bir xəstədə ürək çatışmazlığı olduqda bədən qan və oksigeni ətraflara yaxşı paylamır. Qan və oksigeni beyində və ürəkdə cəmləşdirir. Bu, bədənin hərəkətini çətinləşdirir.

Gəzinti, pilləkənlərlə qalxma və enmə kimi gündəlik fəaliyyətlər daha çətin ola bilər.

Sürətli ürək döyüntüsü

Ürək çatışmazlığında ürək kifayət qədər pompalanan qan miqdarını kompensasiya etmək üçün daha sürətli döyünə bilər. Xəstə ürəyin çox sürətlə döyündüyünü hiss edə bilər.

Düzənsiz ürək döyüntüsü

Atrial fibrilasiya (AFib) kimi ürək ritminin pozulması sürətli və nizamsız ürək döyüntüsünə səbəb ola bilər. Xəstələrdə ürək döyüntüsü və ya çarpıntı ola bilər.

Atrial fibrilasiya müalicə edilmədikdə qan laxtalanmasına və insultlara səbəb ola bilər. Xəstənin nizamsız bir ürək döyüntüsünü hiss etməməsi, nəfəs darlığı, yorğunluq və ya başgicəllənmə hiss etməsi də mümkündür.

Nubar Süleymanova, “İki sahil”