Oktyabrın 7-də COP29-un baş ofisində Nigeriya, Keniya və Cənubi Afrika Respublikasından gələn xarici media nümayəndələri üçün brifinq keçirilib.

“İki sahil” xəbər verir ki, tədbir çərçivəsində xarici jurnalistlər üçün mediatur da təşkil olunub.

COP prosesinin təqviminə daxil edilən başlıca tədbirlər, fərqli istiqamətlərdə aparılan intensiv hazırlıq prosesi, konfransın keçiriləcəyi Bakı Olimpiya Stadionunda COP29-la bağlı müxtəlif məqsədlər üzrə ərazi bölgüsü və müvafiq infrastrukturun qurulması istiqamətində aparılan işlər barədə ətraflı məlumat verilib.

İştirakçılar, eyni zamanda, COP29 zamanı bütün rəsmi tədbirlərin keçiriləcəyi məkan olan Mavi Zonanın, eləcə də müxtəlif tərəfləri innovativ iqlim yanaşmaları üçün bir araya gətirəcək Yaşıl Zonanın qurulması üzrə görülən işlər barədə məlumatlandırılıb, prosesin plana uyğun şəkildə davam etdiyi bildirilib.

Həmçinin qlobal əhəmiyyətli konfransda iştirak üçün Bakıya gələcək minlərlə beynəlxalq nümayəndənin məmnunluğunun təmin olunması məqsədilə nəqliyyat, qonaqlama və qidalanma istiqamətində görülmüş işlər, nəzərdə tutulan əlavə tədbirlər brifinq iştirakçılarının diqqətinə çatdırılıb.

Qeyd olunub ki, intensiv şəkildə davam edən əməliyyatların bütün fazalarında COP29 Əməliyyat Şirkətinin əsas hədəflərindən biri ekoloji təsirləri və karbon ayaq izinin yolverilən minimumda saxlanılmasıdır.

Tədbir jurnalistləri maraqlandıran məsələlər ətrafında müzakirələr və sual-cavab sessiyası ilə davam edib.