Stokholmda 48 uşaq bağçası narkotik alverinin açıq şəkildə baş verdiyi ərazilərdə yerləşir.

“İki sahil” xəbər verir ki,  hər gün 2200-ə yaxın uşaq narkomaniyanın və kriminal münaqişələrin müxtəlif təzahürləri ilə üzləşmək riskinə məruz qalır. Ən böyük risklər narkotiklərin qanunsuz dövriyyəsinin cinayətkar dəstələrin fəaliyyəti ilə sıx bağlı olduğu Şerholmen bölgəsində müşahidə olunur. Uşaq bağçasının işçiləri və rəhbərləri mümkün zorakılıq hadisələrindən yayınmaq üçün mütəmadi olaraq əlavə təhlükəsizlik tədbirləri görürlər.

Stokholmun narkomanlara yardım göstərilən mərkəzlərin yerləşdiyi hissəsində uşaqlar narkotik təsiri altında olan insanlarla və istifadə edilmiş iynələrlə qarşılaşırlar. Bu ərazilərdə bağçalar açılmazdan əvvəl ərazilərin təmizlənməsi məcburi prosedura çevrilib və tərbiyəçilər uşaqların təhlükəsizliyini təmin etmək üçün əlavə yoxlamalar aparırlar.

Bu yaxınlarda Stokholmda “Açıq narkotik zonaları” mövzusunda dissertasiya müdafiə edən keçmiş polis əməkdaşı Mia-Mariya Magnusson qeyd edir ki, belə ərazilərdə böyüyən uşaqlar, əsasən cinayətin və zorakılığın mövcudluğunu normal qəbul edirlər. Bu, onların dünyanı qavramasına və gələcəkdə zorakılığa qarşı dözümlülük səviyyəsinə mənfi təsir göstərə bilər. Bu ilin yazında Şerholmendəki uşaq bağçalarından birinin yaxınlığında uşaqlar içəridə olarkən atışma baş verib. Hadisə nəticəsində bağça rəhbərliyi uşaqları və işçiləri binanın içərisinə kilidləyərək təhlükəsizlik tədbirləri görməyə məcbur olub. O vaxtdan bəri ərazidəki bir neçə uşaq bağçası xarici risklərin olduğu dövrlərdə uşaqların bayırda olmasını məhdudlaşdırıb.

Magnusson vurğulayır ki, artan təhlükəsizlik tədbirlərinə, polis, yanğınsöndürmə xidmətləri və bələdiyyələr ilə sıx əməkdaşlığa baxmayaraq, küçə cinayətkarlarının, narkomanların daimi mövcudluğu uşaqların uzunmüddətli perspektivdə inkişafına təsir edə biləcək şərait yaradır.