“Serbiya günlərdir ki, hibrid müharibə ilə qarşı-qarşıya qalıb”.

“İki sahil” xəbər verir ki, bunu Serbiya Prezidenti Aleksandar Vuçiç ictimaiyyətə müraciətində deyib.

“Serbiya dövlətə qarşı müxtəlif təzyiq qrupları, ilk növbədə xaricdən əhəmiyyətli dəstək alan bəzi siyasi şəxslər tərəfindən aparılan hibrid müharibə cəhdi ilə üzləşib. Bu işdə onlara həm də xaricdən maliyyələşdirilən xüsusi media təzyiq qrupları kömək edir”, - deyə Serbiya Prezidenti qeyd edib.

O, Novı Sad şəhərində dəmiryolu vağzalında 15 nəfərin öldüyü qəzanın baş verdiyi yerdə abidənin ucaldılması təşəbbüsü ilə çıxış etdiyini bildirib.

Aleksandar Vuçiç, həmçinin Serbiyanın üçüncü rübdə Avropada artım tempinə görə Maltadan sonra ikinci yerdə qərarlaşdığını, 2027-ci ildə Belqradın ev sahibliyi edəcəyi “Expo 2027” ixtisaslaşdırılmış sərgisinin ölkəsi üçün böyük fürsət olduğunu deyib.