Cari ilin yanvar ayının 7-də ölkə Prezidenti İlham Əliyevin yerli televiziya kanallarına verdiyi müsahibədə də gündəmi maraqlandıran bir çox məqamlara aydınlıq gətirmiş oldu. Bu müsahibə, Azərbaycanın hazırkı inkişaf mərhələsi, xarici siyasət prioritetləri, daxili islahatlar və cəmiyyətin gələcək perspektivləri ilə bağlı prezidentin mövqeyini açıqladığı mühüm bir platforma oldu. Dövlət başçısı müsahibəsində Azərbaycanın bu və ya digər sahələrdə qazandığı uğurlardan geniş bəhs edərək diqqəti Qazaxın 4 kəndinin azad edilməsinə, eyni zamanda, hazırkı dövrün əsas çağırışlarından olan sülh müqaviləsinin imzalanması prosesinin uzanmasına yönəltdi. Vurğuladı ki, Ermənistanın işğalçı siyasəti hər hansı dialoqu nəzərdə tutmurdu, onlar danışıqlar formatından işğalı davam etdirmək üçün pərdə kimi istifadə edirdilər. Bu, dialoq deyil, monoloq nəticəsində baş verdi. Belə ki, Ermənistanla onilliklər ərzində dialoqun alınmaması aydındır. Ermənistan Azərbaycan ərazilərinin bir santimetrini belə azad etmək istəmirdi. Onlar hesab edirdilər ki, bir müttəfiqdən milyardlarla dollarlıq pulsuz silah, digər ikisindən isə siyasi və mənəvi dəstək aldıqlarına görə özlərini rahat hiss edirlər. ATƏT-in Minsk qrupunun üç həmsədrinin hamısı həmin dövrdə birmənalı olaraq işğalçının tərəfində idi. Bu ərazilərin dialoq yolu ilə qaytarılacağını güman etmirdik. "Azərbaycan vətəndaşları ildən-ilə daha yaxşı yaşamalıdırlar" devizini hər zaman prioritet hesab edən ölkə başçısı qeyd edib ki, bu il yanvarın birindən minimum əməkhaqqı 55 manat artıb və 400 manata çatıb. Minimum pensiya 40 manat artıb və 320 manata çatıb. Orta hesabla artım 14-15 faizdir. Bu qədər böyük sərmayə qoyan və Qarabağın bərpası kimi qarşımızda bu qədər böyük problemi olan ölkədə bu sahəyə də bu diqqəti yetirmək, əlbəttə ki, bizim siyasətimizin, necə deyərlər, mahiyyətini göstərir. Bu addımlar Azərbaycan vətəndaşlarının ildən-ilə daha yaxşı yaşaması üçün atılır. Əgər biz bu artımı inflyasiyanın dərəcəsi ilə müqayisə etsək, - hansı ki, keçən il 2 faizdən bir qədər çox idi, - yəni, bu artım məhz az müdafiə olunan təbəqə üçün dövlət tərəfindən növbəti yardımdır. Hər şey cəmiyyətdə də, siyasətdə də, ailədə də ədalətli olmalıdır və sosial ədalət prinsipləri həmişə bizim üçün vacib olub. İmkan yarandıqca, biz ilk növbədə, bu sahəni də, necə deyərlər, diqqətdə saxlamışıq. Son bir neçə il ərzində dörd sosial paket həyata keçirildi və bu məqsədlər üçün 7 milyard manatdan çox vəsait xərcləndi. Bundan sonra da sosial və iqtisadi inkişaf yanbayan gedəcək. İqtisadi imkanlar artdıqca biz daim sosial məsələlərin həllinə - minimum əməkhaqqı, pensiya, sosial müavinətlərin artırılması məsələlərinə də daim diqqət göstərəcəyik.
Müsahibə zamanı Prezident İlham Əliyev Zəngəzur dəhlizinin açılmasının vacibliyini qeyd edərək, bunun mütləq həyata keçiriləcəyini bildirib. Prezident Azərbaycanın Ermənistan üçün təhlükə mənbəyi olmadığını, əksinə, Cənubi Qafqazda sülh və əməkdaşlıq istəyində olduğunu bildirib. O, Ermənistanın Türkiyə ilə Azərbaycan arasında coğrafi maneə kimi fəaliyyət göstərməməli olduğunu və Zəngəzur dəhlizinin açılmasının zəruriliyini qeyd edib. Cənab İlham Əliyev bir daha bu əminliyi ifadə etdi ki, sülh müqaviləsi ilə bağlı bütün şərtlərimiz qəbul ediləcək. Çünki bu şərtlərdə hər hansı bir fövqəladə məsələ yoxdur. Əgər Ermənistana sülh müqaviləsi lazım deyilsə, bizə də lazım deyil. Bu imzalanmadan da biz yaşaya və öz siyasətimizi apara bilərik: “Yəni, mən yenə də Ermənistan tərəfinə məsləhət görərdim ki, hər şeyi yaxşı ölçüb-biçsin, o cümlədən dünyadakı geosiyasi dəyişiklikləri. Onların yaxın dostları siyasi səhnədən biabırçılıqla silinirlər”. Dövlət başçısı qeyd edib ki, biz üç il ərzində 10 yaşayış məntəqəsinə keçmiş köçkünlərin qayıdışına, on mindən çox köçkünün yaşayış evləri ilə təmin olunmasına nail olmuşuq. Bütövlükdə orada 30 minə yaxın insan yaşayır, müxtəlif vəzifələrdə çalışır. Bu il üçün bizim planlarımızda daha 20-yə yaxın yaşayış məntəqəsinə keçmiş köçkünləri qaytarmaqdır.
Vətən müharibəsində Müzəffər Ali Baş Komandan İlham Əliyevin rəhbərliyi, Ordumuzun gücü, əsgərlərimizin qəhrəmanlığı, cəsurluğu ilə qazanılan bu şanlı qələbə Azərbaycanın çoxəsrlik tarixinə qızıl hərflərlə həkk olundu. Vətən Müharibəsində qələbədən sonrakı dövr Azərbaycan Prezidenti cənab İlham Əliyev və Birinci vitse-prezident Mehriban xanım Əliyevanın işğaldan azad olunmuş torpaqlarımıza mütəmadi olaraq səfərləri ilə, əlamətdar tədbirlər və böyük hadisələrlə yadda qaldı. Qısa bir zamanda işğaldan azad olunan torpaqlarımız böyük tikinti-quruculuq meydanına çevrildi.
Ayaz Cəbrayılov,
Yeni Azərbaycan Partiyası Kürdəmir rayon təşkilatının sədri
