Müntəzəm olaraq qulaqcıqlardan istifadə etmək demensiya riskini artıra bilər. Bununla belə, bir ümumi parametrin dəyişdirilməsi riski azaltmağa kömək edə bilər.

Sosial şəbəkələrdə @doctor.bing kimi tanınan doktor Beybinq Çen milyonlarla insanın gündəlik olaraq sağlamlıqlarına tədricən mənfi təsir göstərən hərəkətlə bağlı tövsiyəsini paylaşıb.

Həkim qeyd edib ki, yüksək səsli musiqi təkcə qulaqlar deyil, həm də beyin üçün zərərlidir. “Hətta yüngül dərəcədə eşitmə qabiliyyətinin itirilməsi demensiya riskini iki dəfə, ağır dərəcədə eşitmə qabiliyyətinin itirilməsi isə onu 5 dəfə artırır. Bu ona görə baş verir ki, beyin səsi çətinliklə emal etdikdə o, düşüncə və yaddaşdan olan resursları yenidən paylaşdırır, bu da koqnitiv qabiliyyətlərin zəifləməsini artırır”, - deyə Çen əlavə edib.

Alzheymer Cəmiyyətinin məlumatına görə, eşitmə problemi olan insanlarda demensiyanın inkişaf riski arta bilər. Bundan əlavə, bu, demensiyanı aşkar etməyə imkan verən erkən simptomlardan biri ola bilər. Onlar əlavə edirlər ki, eşitmə qabiliyyətini yoxlamaq çox vacibdir.

Nevroloq əlavə edib: “Şəhər nəqliyyatının səs-küyü kimi 85 desibeldən yuxarı səslər zamanla zərər vura bilər. Yüksək səsli konsertlər və ya maksimum səs səviyyəsində qulaqlıqlar kimi 100 dB-dən yuxarı səslərin təsiri cəmi 15 dəqiqə ərzində geriyə dönüşü olmayan eşitmə itkisinə səbəb ola bilər”.

Araşdırmalardan biri beynimizin səsi emal edən hissələrinin zədələnməyə xüsusilə həssas olduğunu göstərib. Qulaqlıqların səsinin azaldılması və fasilələrlə dinləmə eşitmə qabiliyyətinizi qorumağa kömək edə bilər.

Harvard Tibb İnstitutunun ekspertləri iddia edirlər ki, 70 dB-dən aşağı səs səviyyəsi çətin ki, qulaqlara əhəmiyyətli ziyan vursun. Bunu, Ümumdünya Səhiyyə Təşkilatı da təsdiq edir. Təşkilat bildirir ki, cihazınızın səsini maksimumun 60 faizindən aşağı saxlamaq daha yaxşıdır.

AZƏRTAC