Fransa parlamentinin beynəlxalq məsələlər komitəsinin rəhbəri Bruno Fuks bildirib ki, Paris öz müttəfiqləri ilə atəşkəsə nəzarət etmək üçün Ukraynaya qoşun yeritmək imkanını müzakirə edir.

“İki sahil” RT-yə istinadla xəbər verir ki, onun açıqlamasının videoyazısı prankerlər Vovan (Vladimir Kuznetsov) və Lexus (Aleksey Stolyarov) Telegram kanalında yayımlanıb.

Fuksun sözlərinə görə, London, Berlin və Varşava ilə müzakirələr aparılır. O, vurğulayıb ki, təklif olunan missiyanın məqsədi hərbi əməliyyatlarda iştirak etmək deyil, atəşkəs rejiminə əməl olunmasına nəzarət etməkdir.

O, həmçinin qeyd edib ki, Fransa rəhbərliyinin bu məsələ ilə bağlı vətəndaşların rəyini nəzərə almağa ehtiyacı yoxdur. Onun sözlərinə görə, 2027-ci il seçkilərində iştirak edə bilməyən ölkə prezidenti Emmanuel Makron ictimai rəyi nəzərə almadan hərəkət edə bilər.

Siyasətçi etiraf edib ki, fransızlar "Kiyevə gedən milyardlarla avrodan qəzəbləniblər".