Fransada kibertəhlükələr və şəxsi məlumatların sızdırılması halları getdikcə artır və artıq bütün sektorları əhatə edir. Ticarət müəssisələri, xəstəxanalar, dövlət qurumları - heç bir təşkilat bu genişmiqyaslı kiberhücum dalğasından yayınmır.
“İki sahil” xəbər verir ki, son nümunələr sırasında turizm sektorunun iri şirkətləri olan “Gîtes de France”, “Belambra və Pierre & Vacances-Center Parcs” milyonlarla müştərilərinin məlumatlarının oğurlandığını təsdiqləyiblər.
Artan təhdidlər fonunda Fransanın Məlumatların Mühafizəsi üzrə Milli Komissiyası (CNIL) 2025-ci il üzrə illik hesabatını yayımlayıb.
“Radio France”ın məlumatına görə, hesabatda narahatedici rəqəmlər açıqlanıb: ötən il 6167 şəxsi məlumat pozuntusu qeydə alınıb ki, bu da 2024-cü illə müqayisədə 9,5% artım deməkdir. Bu insidentlərin təxminən 40-ı çox böyük məlumat bazalarına aid olub və onların hər biri bir milyondan çox şəxsin məlumatını ehtiva edə bilər. Bu tendensiya kiberhücumların getdikcə daha kütləvi və strukturlaşdırılmış xarakter aldığını göstərir.
Mövcud vəziyyət qarşısında Fransanın şəxsi məlumatlar üzrə nəzarətçisi hesab edilən CNIL fəaliyyətini əhəmiyyətli dərəcədə gücləndirmək niyyətindədir. Qurumun prezidenti Mari-Lor Deni daha sərt strategiyanın tətbiq ediləcəyini açıqlayıb. Bu strategiya daha çox yoxlama və sanksiyaları əhatə edəcək.
Tənzimləyici qurum artıq qaydaları sərtləşdirməyə başlayıb. Yanvar ayından etibarən həssas məlumat bazalarına giriş sistemlərinin gücləndirilməsi tələb olunur. Sadə parol sistemi artıq ən çox risk daşıyan sistemlər üçün kifayət hesab edilmir. CNIL bundan sonra çoxmərhələli identifikasiya sistemlərinə üstünlük verir. Bu üsul bir neçə təsdiq mərhələsini birləşdirərək icazəsiz giriş riskini azaltmağa yönəlib. Bu dəyişiklik uzaqdan giriş sistemlərində aşkarlanan boşluqlardan sonra həyata keçirilib, çünki həmin boşluqlar kibercinayətkarlar üçün əsas giriş qapılarından biri sayılır.
Qurum rəhbərinin sözlərinə görə, hazırda bu mövzu üzrə təxminən 20 yoxlama və 10 sanksiya proseduru davam edir. CNIL yalnız texniki boşluqlarla bağlı deyil, həm də yeni yaranan təhlükə barədə xəbərdarlıq edir: kibercinayətkarların süni intellektdən istifadəsi sürətlə artır. Süni intellekt hücumların avtomatlaşdırılmasına, kütləviləşdirilməsinə və fərdiləşdirilməsinə imkan verir ki, bu da dələduzluq cəhdlərini aşkar etməyi daha da çətinləşdirir.
