1 iyun tarixindən etibarən Gürcüstan Daxili İşlər Nazirliyinin İnsan Hüquqlarının Müdafiəsi Departamentinin tərkibində Kommunikasiyaların Sistemli Monitorinqi İdarəsi fəaliyyətə başlayıb.

“İki sahil” "Kommersant"a istinadla xəbər verir ki, bu barədə Gürcüstan hökumətinin baş nazir müavini və güc strukturlarına nəzarət edən Mamuka Mdinaradze brifinq zamanı məlumat verib.

Onun sözlərinə görə, yeni qurumun əsas vəzifəsi sosial şəbəkələrdə və digər kommunikasiya platformalarında nifrət nitqi, vətəndaşların şərəf və ləyaqətinin təhqir edilməsi, eləcə də təhqiredici kampaniyaların aşkarlanması və monitorinqidir.

Nazirliyin açıqlamasına əsasən, yeni idarə pozuntuları müəyyən edəcək, inzibati işlərin başlanması üçün materiallar hazırlayacaq, protokollar tərtib edərək məhkəməyə təqdim edəcək. İdarənin fəaliyyətə başlaması Gürcüstanın inzibati qanunvericiliyinə ötən il edilmiş dəyişikliklərlə bağlıdır. Bu dəyişikliklər hakim Georgian Dream partiyasının təşəbbüsü ilə qəbul olunub.

Nifrət nitqi və insan ləyaqətinin təhqirinə görə 5 min lariyə qədər cərimə və ya 15 sutkayadək inzibati həbs tətbiq oluna bilər. Vəzifəli şəxslərin, o cümlədən dövlət məmurlarının təhqir olunmasına görə isə 6 min lariyə qədər cərimə və ya 45 sutkayadək inzibati həbs nəzərdə tutulur. 

Yeni idarədə ilkin mərhələdə 10 əməkdaş çalışacaq. Quruma hüquqşünas Tamta Kimbarishvili rəhbərlik edəcək.