İraqın cənubunda yerləşən Bəsrə şəhərinin dəniz limanında pilotsuz uçuş aparatının (PUA) hücumu səbəbindən neftin tankerlərə yüklənməsi prosesi müvəqqəti olaraq dayandırılıb.

“İki sahil” xəbər verir ki, bu barədə məlumatı İraqın "Baghdad Today" xəbər portalı yayıb.

Limandakı təhlükəsizlik xidmətindəki mənbələrin verdiyi məlumata görə, bir qədər əvvəl naməlum PUA Bəsrə terminallarından birində dayanan xarici neft tankerinə çırpılıb. PUA-nın çırpılması nəticəsində tankerdə hər hansı ciddi dağıntı qeydə alınmayıb və yanğın baş verməyib. Ekipaj üzvləri arasında xəsarət alan olmayıb.

Hadisədən dərhal sonra limandakı təhlükəsizlik rəhbərliyi vəziyyəti qiymətləndirmək və potensial risklərin qarşısını almaq üçün neft yükləmə əməliyyatlarını müvəqqəti olaraq dayandırmaq qərarı verib. Ehtiyat tədbirləri çərçivəsində hücuma məruz qalan tanker və yaxınlıqda lövbər salmış digər bir gəmi liman akvatoriyasından kənara - təhlükəsiz zonaya yedəklənib.

Hələlik pilotsuz aparatın hansı istiqamətdən idarə olunduğu və hücumun arxasında kimin dayandığı barədə rəsmi açıqlama verilməyib. Heç bir qruplaşma hadisəyə görə məsuliyyəti üzərinə götürməyib. Regional təhlükəsizlik ekspertləri qeyd edirlər ki, strateji əhəmiyyətli Bəsrə limanının fəaliyyətindəki hər hansı fasilə qlobal neft bazarlarında qiymətlərin artmasına birbaşa təsir göstərə bilər.