İyulun 10-da Yunanıstanın Saloniki şəhərindən Almaniyanın Memmingen şəhərinə uçan Ryanair təyyarəsinin sərnişini salonun sınmış illüminatorunda başı ilişmiş vəziyyətdə qalıb və digər sərnişinlər onu təyyarənin içərisinə çəkməli olublar.

“İki sahil” xəbər verir ki, iyul ayında bir sərnişin Ryanair təyyarəsindən az qala çölə sovrulub. ABŞ Milli Nəqliyyat Təhlükəsizliyi Şurasının (NTSB) cümə axşamı yaydığı məlumata görə, hadisəyə mühərrikdən qopan qalıqlar səbəb olub. İyulun 10-da Yunanıstanın Saloniki şəhərindən Almaniyanın Memmingen şəhərinə uçan təyyarədə olan turist salonun sınmış illüminatorunda başı ilişmiş vəziyyətdə qalıb və digər sərnişinlər onu təyyarənin daxilinə çəkməli olublar.

ABŞ Milli Nəqliyyat Təhlükəsizliyi Şurasının (NTSB) araşdırma ilə bağlı ilkin hesabatında bildirilir ki, təyyarənin sağ mühərriki qalxış zamanı “ventilyator pərinin qopması ilə müşayiət olunan nasazlıq” keçirib. Mühərrikin ventilyator pərlərindən biri yerindən qopub.

“Mühərrikdən qopan qalıqlar təyyarənin gövdəsini deşərək salonun hermetikliyinin pozulmasına səbəb olub”, — deyə hesabatda qeyd edilir.

Hesabatda daha sonra bildirilir ki, stüardessa sərnişinin “zədələnmiş salon pəncərəsində qismən ilişib qaldığını və pəncərənin bütövlükdə yerində olmadığını” müəyyən edib. Sənədə əsasən, sərnişin ağır xəsarət alıb.

Müstəntiqlər mühərrikin daxilində quş qalıqları aşkar ediblər. Bununla belə, onlar pərin qopmasına səbəb olan amillə bağlı hələlik hər hansı nəticəyə gəlməyiblər.

Sərnişinlərdən biri hadisəni Radio Thessalonique-ə danışıb: “Təkərin partlamasına bənzər bir səs eşidildi.”

“Dərhal başa düşdük ki, təzyiq itkisi baş verib. Qışqırıqlar eşidilirdi... Bir anlıq düşündüm ki, kimsə səhvən qəza çıxışının qapısını açıb”, — deyə o bildirib.

NTSB-nin məlumatına görə, mühərrikdən qopan qalıqlar təyyarənin gövdəsinin digər hissələrinə də ziyan vurub.

NTSB-nin tam araşdırması iki ilə qədər davam edə bilər.