Çin Xalq Respublikasının (ÇXR) Rusiya Federasiyasındakı səfiri Çjan Xanxuey bəyan edib ki, dünya qeyri-sabitliyi şəraitində Rusiya Prezidenti Vladimir Putin və ÇXR Sədri Si Çinpin ikitərəfli münasibətləri daha yüksək səviyyəyə qaldırmağa çalışırlar.

“İki sahil” xəbər verir ki, bu barədə TASS məlumat yayıb.

"Cari ilin may ayında Pekində ÇXR Sədri Si Çinpin və Rusiya Prezidenti Vladimir Putin arasında mühüm görüş baş tutdu. Bu görüş ikitərəfli münasibətləri keyfiyyətcə yeni mərhələyə çıxararaq əməkdaşlığın daha fəal və dinamik inkişafı üçün imkanlar açdı. Mürəkkəb və qeyri-sabit beynəlxalq şəraitdə ölkə liderləri Çin-Rusiya əlaqələrini daha yüksək səviyyəyə yönəltməkdə davam edirlər. Tərəfdaşlığın sabitliyi və davamlılığı xarici qeyri-müəyyənliyi dəf etmək, hər iki ölkənin birgə inkişafı və intibahı, eləcə də beynəlxalq ədalət və hüquq qaydalarını müdafiə etmək üçün dayaqlıq rolu oynayır", — deyə diplomat "Rusiya və Çin – qarşılıqlı faydalı əməkdaşlıq" forumunun biznes proqramının açılışında vurğulayıb.

Səfir həmçinin Rusiya-Çin münasibətlərindəki yubiley tarixlərini — strateji tərəfdaşlığın 30 illiyini və Dostluq, mehriban qonşuluq və əməkdaşlıq haqqında Müqavilənin imzalanmasının 25 illiyini xüsusi qeyd edib.