Parisin Luvr muzeyində 2025-ci il oktyabrın 19-da baş vermiş və ölkədə geniş rezonans doğurmuş qarətdən bir il keçməsinə baxmayaraq, oğurlanmış səkkiz qiymətli zinət əşyası hələ də tapılmayıb. İstintaq çərçivəsində şübhəlilər saxlanılsa da, qənimətin taleyi və cinayətin mümkün sifarişçilərinin kimliyi ilə bağlı suallar açıq qalır.

“İki sahil” xəbər verir ki, TF1 telekanalının məlumatına görə, oğurlanmış əşyaların izi sonuncu dəfə Sena-Sen-Deni departamentinin Obervilye şəhərindəki yeraltı dayanacaqda qeydə alınıb. Müşahidə kameraları iki dəbilqəli şəxsin qarətdən təxminən bir saat sonra qarajların qarşısında qənimətin bir hissəsini nümayiş etdirdiyini göstərib. Bu görüntülər zinət əşyalarının yerinin müəyyənləşdirilməsi istiqamətində istintaqın son mühüm izlərindən biri hesab olunur.

Fransa polisi bir neçə həftə ərzində cinayəti törətməkdə şübhəli bilinən dörd nəfəri saxlayıb. Onlardan ikisi ittihamları qəbul etmir, digər ikisi isə hadisədə iştiraklarını qismən etiraf etsələr də, oğurlanmış əşyaların harada gizlədildiyini açıqlamırlar. Ehtimal edilən sifarişçinin kimliyi də hələlik müəyyənləşdirilməyib.

Quldurluqla Mübarizə Briqadasının keçmiş rəhbəri, fəxri general komissar Paskal Karro bildirib ki, istintaqçılar bütün mümkün versiyaları araşdırmaqda davam edirlər. Onun sözlərinə görə, zinət əşyalarının Mont-Sen-Mişel körfəzindəki gəmidə və ya Parisdə müəyyən bir ünvanda gizlədilməsi barədə məlumatlar da yoxlanılıb, lakin bu istiqamətlər nəticə verməyib.

İstintaq zamanı Luvrun təhlükəsizlik sistemindəki boşluqlar da diqqət mərkəzinə düşüb. Belə ki, muzeyin mühafizəsindəki çatışmazlıqlar və oğurluq zamanı yükqaldıran platformalı avtomobildən istifadə ehtimalı hələ 2018-ci ildə hazırlanmış hesabatda qeyd olunub.

Hazırda Quldurluqla Mübarizə Briqadasının bir neçə əməkdaşı iş üzrə araşdırmaları davam etdirir. İstintaqçılar, həmçinin xarici ölkələrdə də yoxlamaların aparılmasına göstəriş veriblər. Bununla belə, oğurlanmış əşyaların maddi izlərinin aşkar edilməməsi araşdırmanı çətinləşdirir.

Oğurlanan qiymətli əşyalardan yalnız imperatrisa Yevgeniyanın tacı tapılıb. Qarətçilər qaçarkən yerə düşdüyündən zədələnən tac hazırda mütəxəssislər tərəfindən bərpa olunur.

Beləliklə, Luvr muzeyinin qarətindən bir il sonra oğurlanmış zinət əşyalarının haradasa gizlədildiyi, yoxsa qiymətli daşlarının çıxarılaraq əridildiyi barədə suallar cavabsız qalır. Fransa hüquq-mühafizə orqanları qənimətin tapılması və cinayətin bütün iştirakçılarının müəyyənləşdirilməsi istiqamətində araşdırmaları davam etdirirlər.