Danimarkada maskalı şəxslər Kopenhagen yaxınlığındakı “Lyngby Storcenter” ticarət mərkəzində yerləşən “Pokémon” kolleksiya kartları mağazasını qarət ediblər.

“İki sahil” xəbər verir ki, oğurlanmış əşyaların dəyəri 1 milyon kronu (təxminən 155.000 dollar) keçib.

Polisin məlumatına görə, oğrular “Rogerz” mağazasına girərək işçini silaha oxşayan əşya ilə hədələyiblər. Onlar şüşə vitrini sındırıb və qiymətli kolleksiya kartlarını oğurlayıblar. Vitrinin birində 200.000 kron dəyərində kartlar olub.

Soyğundan sonra cinayətkarlar qırmızı “Mazda” ilə qaçıblar. Polis axtarış aparır və şahidlərdən şübhəlilər haqqında hər hansı bir məlumat vermələrini xahiş edir.

Son illərdə bahalı “Pokémon” kartları oğruların getdikcə daha çox hədəfinə çevrilir. Oktyabr ayında İsveçdə təxminən 65.000 kron dəyərində kartları qarət etməkdə ittiham olunan üç nəfər məhkum edilib. Fərdi nadir “Pokémon” nüsxələri milyonlarla dollara başa gələ bilər. Fevral ayında amerikalı bloger Logan Paula məxsus “Pikachu Illustrator” kolleksiya kartı hərracda 16 milyon dollara satılıb.