2018-ci ilin 5 iyun tarixində  Səudiyyə Ərəbistanı, Ərəb Əmirlikləri və Bəhreyn Krallığının təmsil olunduqları blokada dövlətlərinin Qətəri öz müstəqil siyasətindən əl çəkməyə məcbur etmək üçün tətbiq etdiyi embarqonun bir ili tamam olur.

Bu gün, amansız blokadanın tətbiqindən bir il keçdikdən sonra Qətər Dövləti yeritdiyi açıq qapı siyasətinin bəhrələrini görür. O, özünün hamı ilə balanslı və çevik əlaqələrindən istifadə edib, rekord müddətdə ilkin tələbat və ərzaq mallarına  alternativ mənbələr tapıb və buna Türkiyə, Azərbaycan və digər dost-qardaş ölkələrlə birbaşa hava daşımaları vasitəsilə müvəffəq olub. O, blokada dövlətlərindən asılılığı aradan qaldırmaq və özünü təmin etmək üçün bi sıra böyük layihələrin birbaşa həyata keçirilməsinə başlayıb.

Blokadanın bir illiyində blokada dövlətlərindən idxal edilən bütün malların Qətərin satış məntəqələrindən yığışdırılması barədə qərar Qətərin blokadanın fövqündə olması barədə həmin dövlətlərə gözlənilməz mesaj oldu. Bu, qarşılıqlıq prinsipinə əsaslanan qərarlar qəbilindən idi. Blokadanı tətbiq etməklə həmin dövlətlər Qətər xalqının gündəlik həyatına zərbə vurmaq istədilər və Qətər bazarlarında əsaslı yer tutan məhsullarının Qətərə daxil olmasını gözlənilmədən qadağan etdilər. Bu gün qətərlilərin yerli, dost və qardaş ölkələrin istehsal etdikləri məhsullara əsaslandıqdan sonra blokada dövlətləri Qətər bazarlarını dəyərindən aşağı qiymətlərlə satılan məhsulları ilə doldurmaq və Dohaya daxil olmaq üçün alternativ bazarlardan istifadə edərək həmin məhsullara zərər vurmağa can atdılar. Bu cəhdlər isə uğursuzluqla nəticələndi.

Paralel olaraq qüruru və suverenlik prinsipini rəhbər tutaraq Qətər blokada dövlətlərinə yönələn siyasətində çeviklik göstərdi və daim bəyan etdi ki, öz körfəzli qardaşları ilə görüşməyə və suverenliyə hörmət etmək şərtilə dialoqa hazırdır. O, 2018-ci ilin mayında Səudiyyə Krallığında keçirilən Körfəz Qalxanı təlimlərində iştirakı qəbul etdi.

Bu gün - Qətərə qarşı amansız blokadanın tətbiq edilməsindən bir il keçdikdən sonra deyə bilərik ki, Qətərin sakit və balanslaşdırılmış diplomatiyası işləri öz mənafeyinə uyğun çevirməyi bacardı, özünün etibarlılığını, terrora qarşı mübarizədə beynəlxalq müstəvidə fəal tərəfdaş olduğunu sübut etdi, problemlə bağlı beynəlxalq ictimaiyyətin rəğbətini qazandı, çünki ekstremizm və terroru dəstəkləməsi barədə ittihamları rədd etdi.

Qətər Dövlətinə qarşı amansız blokadanın tətbiqindən bir il keçdikdən sonra - bu gün bizim haqqımız var ki, soruşaq: blokada dövlətləri əbəs yerə əxlaqi səviyyənin aşağı düşməsi və arzuların boşa çıxmasından başqa nə qazandılar, dəyişən nə oldu?

Qətər öz açıq qapı siyasəti, güclü iqtisadiyyatı, təslimçiliyi rədd edən xalqı, prinsipial rəhbərliyi ilə həmin Qətərdir.

Bəs blokada dövlətləri nə əldə etdilər?

Ola bilsin ki,Körfəz ailəsinin bərpası, dövlətlərin suverenliyi və siyasi iradəsinə hörmət edərək ixtilafları aradan qaldırmaq vaxtı çatıb.

Qısaca desək, bu gün, bloklaşmalar siyasətinin ağalıq etdiyi bir vaxtda, müasir don geyinmiş çoxsaylı müstəmləkəçilik layihələri fonunda Körfəz ailəsinin yenidən öz sıralarına qayıtmağa və birləşməyə həddindən artıq ehtiyacı var. Bu gün hamı üçün aydın bir həqiqətdir ki, Qətər düşmən deyil və olmayacaq.

Yusif bin Həsən əl-Saai