Londonun “Arsenal” futbol klubunun yarımmüdafiəçisi Qranit Caka komandanın kapitanı postundan uzaqlaşdırılıb.

AZƏRTAC İngiltərə mətbuatına istinadla xəbər verir ki, klub bu addımı 27 yaşlı isveçrəli yarımmüdafiəçinin oktyabrın 27-də İngiltərə Premyer Liqası çərçivəsində “Kristal Palas”a (2:2) qarşı keçirilən matçda azarkeşlərlə münaqişə etdiyi üçün atıb.

İspaniyalı mütəxəssis komandanın qabonlu hücumçusu Pyer-Emerik Obameyanqın yeni kapitan təyin edildiyini söyləyib.

Qeyd edək ki, Obameyanq cari mövsümdə London klubunun heyətində keçirdiyi 11 oyunda 9 qol vurub.