17 fevral 2020 20:53
914

2020-ci ildə də sosial rifahın yüksəlişi üçün ciddi əsaslar mövcuddur

2019-cu ildə Prezident İlham Əliyev tərəfindən vətəndaşların sosial rifahının yaxşılaşdırılması istiqamətində qəbul edilən qərarlar  humanitar dəyərinə görə  inqilabi addımlar idi. Çünki bu sahə ilə bağlı imzalanan Fərman və sərəncamlar 4 milyondan çox insanın həyat şəraitinin yaxşılaşmasına xidmət edib. Belə ki, minimum pensiyaların, minimum əməkhaqqının, müavinət və təqaüdlərin artırılması ölkə əhalisinin yarısına qədərinin sosial rifahının yüksəlməsinə səbəb olub.

Keçən il vətəndaşların sosial rifahının yaxşılaşması üçün iki sosial paket  qəbul edilib. Həmin sənədlərə əsasən, minimum əməkhaqqı 2 dəfəyə yaxın artırılaraq 130 manatdan 250 manata çatdırılıb. Bunun sayəsində dövlət sektorunda çalışanların əməkhaqqısı 20-100 faiz artıb. Minimum əməkhaqqının və dövlət sektorunda əməkhaqqının artımı 1 milyon 350 min nəfəri (o cümlədən, dövlət sektoru üzrə 1 milyon, özəl sektor üzrə 350 min nəfəri) əhatə edib.

Əhalinin pensiya təminatının yaxşılaşdırılması istiqamətində mühüm işlər görülüb. Minimum pensiya 72,4 faiz artılıraraq 116 manatdan 200 manata çatdırılıb, həmçinin əməkhaqqı artımı xüsusi şərtlərlə təyin olunan pensiyalarda (hərbçilərin, dövlət qulluqçularının və başqalarının pensiyalarında) 31 faiz artım təmin edilib. Beləliklə, ümumilikdə hər iki istiqamət üzrə pensiya artımı 750 min nəfərdən çox pensiyaçını əhatə edib. Nəticədə Azərbaycan minimum pensiyanın alıcılıq qabiliyyəti indeksi üzrə MDB ölkələri arasında birinci yerə, minimum əməkhaqqının alıcılıq qabiliyyəti indeksi üzrə ikinci yerə yüksəlib.

Həmçinin 2019-cu ildə sosial müavinət və təqaüdlər orta hesabla 100 faiz artırılıb. Həmin artım həssas qrupdan olan vətəndaşlardan ibarət 600 min insanı, o cümlədən 300 minə qədər əlilliyi olan şəxsi əhatə edib. Yeni təqaüd növləri - sağlamlıq imkanları məhdud uşaqlara və 1-ci dərəcə əlilliyi olan şəxslərə qulluq edənlər, müharibə veteranları üçün Prezidentin aylıq təqaüdü təsis edildib. Eyni zamanda, məcburi köçkünlərin müavinətləri, tələbələrin təqaüdləri ciddi şəkildə artırılıb, 800 min insanın problemli kreditlə bağlı olan narahatlığına son qoyulub.

Prezident İlham Əliyev bu barədə: “Keçən il aparılmış islahatlar nəticəsində biz əldə edilmiş əlavə gəlirləri, ilk növbədə, məhz sosial sahəyə yönəltdik. Mən keçən ilin əvvəlində bunu bəyan etmişdim. Demişdim ki, yığılacaq bütün əlavə vəsait sosial sahəyə yönəldiləcəkdir və bunu da etdik. Hər zaman olduğu kimi sözümüzün üstündə dururuq. Sosial sahədə gedən müsbət proseslər və vətəndaşların rifah halının yaxşılaşdırılması bizim üçün prioritet məsələ olaraq qalır”.

Beləliklə, pensiyalarda ciddi artım sayəsində ötən il Azərbaycanda pensiyaların orta aylıq məbləği 15, o cümlədən yaşa görə pensiyaların orta aylıq məbləği 15, əlilliyə görə pensiyaların orta aylıq məbləği 22 faiz artıb.

Təbii ki, Ermənistanın Azərbaycana təcavüzünün qarşısını alarkən əlil olan insanların və şəhid ailələrinin sosial rifahının yaxşılaşdırılmasına dövlət xüsusi diqqət göstərir. Ölkəmizin ərazi bütövlüyünün, müstəqilliyinin və Konstitusiya quruluşunun müdafiəsi uğrunda döyüşdə şəhid olan insanların ailələrinin və əlilliyi olan şəxslərin mənzillə təminatı, həmçinin müharibə əlillərinə minik avtomobillərinin verilməsi ənənə halını alıb. Prezident İlham Əliyev də bu kateqoriyadan olan insanların problemlərinə həssaslıqla yanaşır, onların sosial vəziyyətini yaxşılaşdırmaq üçün operativ qərarlar qəbul edir.

Prezident İlham Əliyevin qayğısı sayəsində 2018-ci ildə Əmək və Əhalinin Sosial Müdafiəsi Nazirliyi tərəfindən şəhid ailələrinə və müharibə əlillərinə nəzərdə tutulduğundan (207 mənzil) 3 dəfə çox olmaqla 626 mənzil təqdim edilibsə, ötən il bundan 50 faiz çox olmaqla 934 mənzil və fərdi ev verilib. Beləliklə, nazirlik tərəfindən indiyədək şəhid ailələrinə və müharibə əlillərinə 7600-ə yaxın mənzil və fərdi ev təqdim edilib. Bu kateqoriyadan olan insanlara göstərilən qayğı cari ildə də davam edəcək. Dövlət başçısının birbaşa tapşırığı ilə bu il şəhid ailələrinə və müharibə əlillərinə ən azı 1500 mənzil və fərdi evin verilməsi nəzərdə tutulub.

Müharibə əlilləri və onlara bərabər tutulanların dövlət tərəfindən minik avtomobilləri ilə təminatı sahəsində xeyli işlər görülüb. 2018-ci ildə bu kateqoriyadan olan insanlara 265 avtomobil verildiyi halda, 2019-cu ildə 600 avtomobil verilib. Ümumilikdə, nazirlik tərəfindən müharibə əlilləri və onlara bərabər tutulan şəxslərə indiyədək 6750 minik avtomobili verilib.

Prezident İlham Əliyevin 2018-ci il 19 aprel tarixli və 28 yanvar 2019-cu il tarixli fərmanlarına əsasən, şəhidlərimizin vərəsələrinə birdəfəlik ödəmə (11 min manat) ilə təminatı sahəsində mühüm addımlar atılıb.

Aparılan araşdırmalar nəticəsində məlum olub ki, şəhid hərbi qulluqçularının və daxili işlər orqanları əməkdaşlarının sayı 12268 nəfərdir və onların vərəsələrinə birdəfəlik ödəmə verilib. Beləliklə, onlardan 12 minədək şəhidin 18 minədək vərəsəsinə nazirlik tərəfindən birdəfəlik ödəmə həyata keçirilib. Şəhidlərin vərəsələrinin birdəfəlik ödəmə ilə təminatı proqramının icra səviyyəsi 98 faizə çatıb.

Bir sözlə, 2020-ci ildə də sosial rifahın yüksəlişi üçün 2019-cu ildəki iqtisadi uğurlar əsas baza rolunu oynayacaq.

Elçin Zaman, “İki sahil”