Soyuducumuz boşaldıqda mağazaya alış-verişə gedərkən çalışırıq ki, evə dadlı və faydalı məhsullar alıb gətirək. İstehsalçıların bəh-bəhlə təriflədikləri, təbii kimi təqdim etdikləri hər məhsul heç də orqanik deyil. Buna görə də, evdə və ya elə mağazadaca məhsulların yaxşısını pisindən ayırmağı bacarmaq lazımdı.

Kolbasa məhsulları

Saxtakarlığa ən çox yol verilən məhsul kolbasadır. Servelatın bu və ya digər halqasında həqiqətən nə qədər ət olduğunu evdə təyin etmək asan deyil, ancaq özünüzü bu məhsuldakı zərərli qatqılardan qorumaq mümkündür.

Belə ki, kolbasada olan ən təhlükəli maddə, davamlı olaraq istehlak edildiyi təqdirdə böyrəyin funksiyasına mənfi təsir göstərən karragenendir. Karragenen məhsulda nəmi saxlamaq üçün istifadə olunur, həm də onun çəkisini artırır.

Hər hansı bir kolbasaya sadəcə bir kəsiklə baxaraq zərərli qatqılar olub-olmadığını yoxlamaq olar. Təbii məhsul parlaq çəhrayı və ya tünd qırmızı deyil, çəhrayı-boz rəngli bir rəngə malik olur.

Pendir

Hazırda marketlərdə çoxlu pendir çeşidləri var. Bu müxtəlifliyə baxmayaraq, bütün pendirlərin bir ümumi xüsusiyyətə malik olduğunu başa düşmək vacibdir - rəngdə aydın bir piqmentin olmaması. Yəni, pendir parlaq sarı və ya narıncı rəngdədirsə, çox güman ki, kalium nitrat ehtiva edir, bu, ürək daxil olmaqla əzələlərə mənfi təsir göstərən bir boyadır.

Vicdansız istehsalçıların pendirə əlavə etdikləri zərərli olan digər bir maddə  nişastadır. Yod bu maddənin qidada təyin edilməsi üçün universal bir vasitə hesab edilir. Bir pendir diliminə bir-iki damla tökmək kifayətdir: mavi rəng alarsa, tərkibi təbii deyil deməkdir.

Xama

Əvvəllər xamanın təbiiliyini qatılığına güvənərək mühakimə etmək olardı: qatıdırsa, üzvi deməkdir. Ancaq son illərdə istehsalçılar süni qatılaşdırıcılarda bitki mənşəli yağlardan istifadə edərək bu meyarı saxtalaşdırmağı öyrəniblər.

Smetanın təbii olub-olmadığını yoxlamaq üçün ondan  bir qaşıq götürüb isti suyun içərisinə qoyun. Bərabər şəkildə yayılaraq, suyu süd kimi edərsə deməli təbii məhsuldur, ancaq xama bir stəkana çöküntü kimi düşərsə , deməli tərkibində süni qatqılar çoxdur.

 Bal

Hər kəs arıçılıq və balla bağlı geniş məlumata malik deyil. Lakin təbii balı, süni baldan ayırmağı bilmək lazımdır. Süni bala nişasta, soya və s. qatırlar.

Bunun üçün bizə yenə yod lazım olacaq. Məhsula bir neçə damcı yod atdıqda rəngi dəyişmirsə, təbiidir, rəngi göyümtülə çalarsa, nişasta ilə hazırlanmış məhsuldur.

 Kürü

Kürü bahalı olduğundan gündəlik istifadə edilməsə də, alarkən keyfiyyətli və orqanik məhsul almağa çalışırıq. Lakin istehsalçılar bəzən təbii kürünün yerinə dəniz yosunlarından hazırlanmış saxta məhsul təqdim edirlər.

Təbii və saxta kürünü ayırd etmək üçün sizə qaynanmış su kömək edəcək. Bir qədər kürünü suya tökün, ağ parçalar şəklində parçalanırsa, bu, əslində zülal olan əsl balıq kürüsüdür. Saxta yosunlardan hazırlanan kürü isə suda iz qoymadan həll olur.

Kərə yağı

Kərə yağı  gündəlik istifadə edilən məhsuldur. Onun tərkibində qatqılar olarsa, sağlamlığımıza ciddi ziyan vura bilər.

İstehsalçının bizi aldatdığını anlamaq üçün satın alınan kərə yağı paketini bir müddət üstünü örtüb qapalı yerə qoymaq kifayətdir. Məhsulun səthində maye damcıları əmələ gələrsə, deməli, qarşınızda təbii kərə yağı yox, marqarin və ya spred yağdır.

 Süd

Südü də tez-tez saxtalaşdırırlar. Bu məhsulun istifadə müddətini artırmaq üçün əsasən quru süd və konservantlar istifadə olunur. Təbii südü seçmək üsulu çox sadədir: üzərinə bir xörək qaşığı xama əlavə edin. Məhsul üzvi olarsa, bir müddət sonra qatığa çevriləcəkdir.

Nubar Süleymanova, “İki sahil”