Günəbaxan tumları çox faydalı məhsul hesab olunur. Son illər ərzində amerikalı alimlər tərəfindən aparılan araşdırmalar təsdiq edib ki, tumun gündəlik az miqdarda istehlakı orqanizmdə qocalma proseslərini ləngidir. Lakin nəzərə alın ki, tum mütləq çiy olmalıdır.
Qeyd edək ki, günəbaxan tumlarının tərkibində çoxlu miqdarda fosfolipid, vitamin və sterollar var. Heç bilirdinizmi ki, fosfolipidlər sözün əsl mənasında möcüzəli bir maddələrdir, onların orqanizmə müsbət təsiri olduqca çoxdur. Onlar ürək-damar sistemi xəstəliklərinin qarşısını alır, qaraciyəri piylənmədən qoruyur, sinir sisteminin fəaliyyətini tənzimləyir və s. Sterollar da, həmçinin həyatı uzatmaq, cavanlığı və sağlamlığı qorumaq xüsusiyyətlərinə malikdir. Bu tumlar E vitamini ilə də zəngindir. O da əsasən gəncləşdiricidir. Həmçinin tum kalium və maqneziumla zəngindir ki, bu 2 maddə isə ürəyin sağlamlığı üçün olduqca vacibdir.
Samirə Tağıyeva, "İki sahil"