"Olimpiadada uğurlu çıxış etmək üçün çox hazırlaşmışdım. Hər gün məşq edirdim. Medalı təmin etdiyim üçün çox sevinirəm".

“İki sahil” xəbər verir ki, bu sözləri Azərbaycan boksçusu Alfonso Dominges (81 kq) Tokio-2020 Yay Olimpiya Oyunlarında yarımfinala vəsiqə qazanması barədə danışarkən deyib.

Dominges 1/4 finalda türkiyəli Bayram Malkana qalib gələrək ən azı bürünc medalı təmin edib. Bununla bağlı danışan boksçu qeyd edib: "Artıq 2 medalımız var. Birini mən qazanmışam. Azərbaycanı çox sevirəm. Özümü möhtəşəm hiss edirəm. Rəqib başını çox aşağı əyirdi. Hakimə dedim ki, döyüşə bilmirəm. Belədə uduza da bilərdim. Ona görə əsəbi idim. Çünki döyüşmək istəyirdim. Hər şey buna görə oldu".

Dominges yarımfinalda kubalı Arlen Lopesə qalib gələcəyinə inandığını bildirib: "Məqsədim qızıl medal qazanmaqdır. Rəqibim olimpiya çempionu olsa da, rinqə qələbə üçün çıxacağam".

Qeyd edək ki, Domingeslə Lopes arasında yarımfinal döyüşü avqustun 1-də olacaq.