Azərbaycan, Rusiya və Ermənistan baş prokurorlarının görüşü keçirilib.

Baş Prokurorluqdan "İki sahil"ə verilən məlumata görə, Baş prokuror Kamran Əliyevin Moskvaya işgüzar səfəri çərçivəsində Rusiya tərəfinin təşəbbüsü ilə Azərbaycan, Rusiya və Ermənistan baş prokurorlarının üçtərəfli görüşü keçirilib.

Kamran Əliyev mina xəritələrinin verilməsinin insanların həyat və sağlamlığının qorunmasında əhəmiyyətini, həmçinin Ermənistan tərəfindən ərazilərimizin minalanma prosesinin davam etdirilməsinin yolverilməzliyini qeyd edib.

Baş prokuror Qarabağa qanunsuz səfərlərin təşkilini və ölkəmizin təbii sərvətlərinin qanunsuz istismarının yolverilməzliyini diqqətə çatdırıb.

1-ci və 2-ci Qarabağ müharibələrindən sonra itkin düşmüş şəxslərin tapılması istiqamətində birgə fəaliyyətin vacibliyinə toxunaraq, bu prosesin davam etdirilməsinin önəmini bildirib.

Eyni zamanda, Azərbaycan tərəfindən 10 noyabr 2020-ci il tarixli 11 yanvar və 26 noyabr 2021-ci il tarixli üçtərəfli bəyanatlara tam şəkildə riayət olunduğu bildirib.

Görüş çərçivəsində Azərbaycan, Rusiya və Ermənistan dövlət başçıları tərəfindən imzalanmış bəyanatların icrası və hüquqi sahədə gələcək əməkdaşlıq mexanizmləri müzakirə edilib.

***

Azərbaycan, Ermənistan və Rusiya baş prokurorları Moskvada görüşüb.

"İki sahil" Rusiya Baş Prokurorluğunun mətbuat xidmətinə istinadən xəbər verir ki, görüşdə Cənubi Qafqazdakı vəziyyət müzakirə olunub.

“Lokal münaqişələrə və böhranlar nəinki geosiyasi mühitə mənfi təsir göstərir, həm də cinayətkarlığın, terrorizm, ekstremizm ideyalarının yayılması, nifrət və düşmənçiliyin yayılmasına münbit şərait yaradır”, - deyə məlumatda deyilir.