27 may 2023 08:21
104

Peru Konqresində Ümummilli Liderin anadan olmasının 100 illiyi qeyd edilib - FOTOLAR

Peru-Azərbaycan parlamentlərarası dostluq qrupunun dəstəyi ilə Peru Konqresində Ümummilli Lider Heydər Əliyevin anadan olmasının 100 illiyinə və Azərbaycan Xalq Cümhuriyyətinin qurulmasının 105-ci ildönümünə - Müstəqillik Gününə həsr olunmuş tədbir keçirilib. Tədbirdə Peru Konqresinin üzvləri, həmin ölkədə akkreditə olunmuş diplomatik nümayəndəliklərin rəhbərləri iştirak ediblər.

Azərbaycanın Meksikadaki səfirliyindən "İki sahil"ə bildirilib ki, tədbiri açan ölkəmizin Perudakı səfiri Məmməd Talıbov 1918-ci il mayın 28-də Azərbaycan Xalq Cümhuriyyətinin yaradılmasının Azərbaycanın dövlətçilik tarixində əhəmiyyətli rol oynamasından, qısa müddət ərzində əldə etdiyi nailiyyətlərdən, həyata keçirdiyi islahatlar və quruculuq işlərindən bəhs edib. Qeyd olunub ki, 1991-ci ildə müstəqilliyini bərpa etdikdən sonra müxtəlif sosial-iqtisadi, siyasi problemlərlə üzləşən, hətta suverenliyini itirmək təhlükəsi ilə qarşılaşan Azərbaycan, yalnız Ümummilli Lider Heydər Əliyevin zəngin dövlətçilik təcrübəsi, atdığı praqmatik addımlar sayəsində tarixin bu ağır sınağından üzüağ çıxa bilib. Heydər Əliyevin uzaqgörən daxili və xarici siyasəti nəticəsində ölkəmizin davamlı inkişaf yoluna qədəm qoyduğu, bütün istiqamətlərdə möhkəm və etibarlı təməl yaradıldığı, eləcə də ölkəmizin inkişafı üçün uğurlu konsepsiyalar hazırlandığı vurğulanıb. Məhz Heydər Əliyev dühasının və praqmatik siyasi kursunun uğurla davam etdirilməsi nəticəsində bu gün Azərbaycanın iqtisadi inkişafına, ictimai-siyasi sabitliyə, beynəlxalq müstəvidə nüfuzuna və mövqeyinə görə qüdrətli bir dövlətə çevrildiyinə diqqət çəkilib.

Sonra tədbirdə Türkiyə, İsrail və Ukrayna səfirləri çıxış edib, Azərbaycanın gündən-günə artan beynəlxalq nüfuzunun təməlində Heydər Əliyevin mükəmməl siyasətinin dayanmasından söz açıblar. Diplomatlar Heydər Əliyevin dünya siyasətinə təsir etmək gücünə malik, qlobal miqyasda təhlillər aparmağı bacaran siyasətçi olduğunu, öz ölkələrində də çox sevildiyini və görkəmli dövlət xadimi kimi yüksək qiymətləndirildiyini qeyd edib, Azərbaycan ilə həmin ölkələr arasında ikitərəfli əməkdaşlıq əlaqələrinin dərinləşdirilməsində əvəzsiz rolunu vurğulayıblar.

Çıxış edən Peru-Azərbaycan parlamentlərarası dostluq qrupunun sədri Xose Enrike Xeri hər iki mötəbər yubiley münasibətilə Azərbaycan xalqına və azərbaycanlı həmkarlarına təbriklərini çatdırıb, belə tədbirlərin təşkilinin ölkələrimiz arasındakı münasibətlərin daha da inkişafına öz müsbət töhfəsini verəcəyindən əmin olduğunu bildirib.