23 noyabr 2023 13:26
327

Müxtəlif rayonlarda Qərbi Azərbaycanla bağlı konfranslar keçiriləcək- İcma sədri

"Qərbi Azərbaycanla bağlı konfrans-festivalların ölkəmizin müxtəlif rayonlarında keçirilməsi nəzərdə tutulub".

“İki sahil” xəbər verir ki, bunu Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli jurnalistlərə açıqlamasında deyib.

Onun sözlərinə görə, Naxçıvan Muxtar Respublikasının müxtəlif rayonlarında məskunlaşmış Qərbi Azərbaycandan olan insanlardan Qərbi Azərbaycana məxsus mədəni irs nümunələri toplanıb: "Eyni zamanda, icma olaraq Naxçıvanın müxtəlif bölgələrində Qərbi azərbaycanlı insanlarla görüşlər olacaq. Sabah bu görüşlərdən biri Ordubad rayonunun Parağa kəndində baş tutacaq. Ardınca Kəngərli rayonunun Çalxanqala kəndinə gedəcəyik".

Ə.Ələkbərli Naxçıvanda keçirilən “Qərbi Azərbaycana qayıdış” festival-konqresinin hər il məhz burada baş tutmasını təlif edib: "Belə tədbirlərin Azərbaycanın müxtəlif rayonlarında da keçirilməsi nəzərdə tutulub. Hesab edirik ki, bu tədbirlər Qərbi Azərbaycana qayıdış konsepsiyasının həyata keçirilməsi yolunda mühüm addımdır. Bu, Qərbi Azərbaycan həqiqətlərinin dünya ictimaiyyətinə çatdırılması istiqamətində irəliyə atılmış tədbirdir. Bütün bölgələrdə Qərbi Azərbaycan İcmasının nümayəndəlikləri açılır. Məqsəd insanlarımızı Qərbi Azərbaycana qayıdış ideyası ətrafında təşkil etmək, onların bu ideya uğrunda mübarizəyə qoşulmasını təmin etməkdir".