Bu il ölkə tarixində ilk dəfə olaraq Bakı-Qəbələ-Bakı istiqamətində sərnişindaşımaya başlanıldı və hazırda yalnız həftəsonları fəaliyyət göstərən bu marşrut üzrə qatarların dolumluluq səviyyəsi 70 %-ə yaxındır.

“İki sahil” xəbər verir ki, bunu “Azərbaycan Dəmir Yolları” QSC-nin Mətbuat Katibliyi şöbəsinin müdiri Sənubər Nəzərova bildirib.

Onun sözlərinə görə, Bakı-Ağstafa-Bakı marşrutu üzrə qatarların dolumluluq səviyyəsi 100 %-i tamamlayır: “Xidmətimizdən istifadə edən sərnişinlərin təxminən 10 %-i xarici turistlərdir”. S.Nəzərova qeyd edib ki, bu il Abşeron dairəvi dəmir yolu xəttinin ətrafında NFC bank kartlarını dəstəkləyən turniketlər mərhələli şəkildə artırılır: “Cari il həmçinin ADY mobil tətbiqi - rəqəmsal həll olaraq sərnişinlərimizə təklif olunub. Artıq 30 mindən çox sərnişin tərəfindən tətbiq yüklənib. Vaxtaşırı olaraq sərnişinlərimizə rəqəmsal mühitdə səfərlərini planlaşdırmaq kimi yeni imkanlar yaradırıq”.

O qeyd edib ki, nəticədə Abşeron dairəvi üzrə kassa və köşklərə yaxınlaşmağa, kağız biletlər almağa, növbələrdə gözləməyə ehtiyac qalmayıb: “Biz özümüz ətraf mühiti qorumaqla sərnişinlərimizi də arxamızca aparırıq və kağız sərfiyyatının minimuma endirilməsini təşviq edirik”.