2023-cü ilin yanvar-sentyabr aylarında Azərbaycandan xarici iqtisadiyyata yönəldilmiş birbaşa investisiyalar 2 milyard 691.9 milyon dollar təşkil edib.

“İki sahil” Azərbaycan Mərkəzi Bankına istinadən xəbər verir ki, bu göstəricinin həcmi ötən ilin müvafiq dövrü ilə müqayisədə 3.6 dəfə və ya 1.9 milyard dollar artıb. Belə ki, 2022-ci ilin müvafiq dövründə Azərbaycanda xarici iqtisadiyyata yönəldilmiş birbaşa investisiyaların həcmi 759.1 milyon dollar təşkil edib.

Qeyd edək ki, Azərbaycandan ən çox birbaşa investisiya Türkiyə iqtisadiyyatına yatırılıb. Hesabat dövründə Azərbaycandan Türkiyəyə 1 milyard 760,2 milyon dollar investisiya yatırılıb ki, bu da illik müqayisədə 20 dəfə çoxdur.