Sağlamlığa saysız-hesabsız faydaları olan qırmızı rəngli qidalar xəstəliklərlə mübarizədə də effektivdir.

“İki sahil” “CNN Türk”ə istinadla xəbər verir ki, Türkiyəli diyetoloq Betül Serttaş müalicəvi qırmızı qidalar və onların insan orqanizminə faydalarından bəhs edib.

İtburnu: Hələ qədim dövrlərdən insanlar itburnu bitkisini bir çox xəstəliklər zamanı xalq təbabəti kimi istifadə ediblər. Bu bitki güclü C vitamini təsiri sayəsində soyuqdəymə başda olmaqla bir çox xəstəliyə qarşı immunitet sistemini gücləndirir. Bundan əlavə, oynaq ağrılarını aradan qaldırır və damar tıxanması, iltihab və diabet kimi bir çox xəstəliklərdən qoruyur.

Qırmızı bibər: Limon və portağal kimi sitrus meyvələri cəmiyyətimizdə C vitamini mənbəyi kimi tanınsa da, qırmızı bibərin tərkibində C vitamini sitrus meyvələrindən daha yüksəkdir. Maddələr mübadiləmizi canlandırmaq üçün gündəlik qida rasionumuza bol qırmızı bibər əlavə etmək faydalıdır.

Çuğundur: Sağlamlıq üçün faydalı olan qırmızı qidalar siyahısında təbii maddələr mübadiləsinə uyğun çuğunduru qeyd etməmək mümkün deyil. Kalium, maqnezium, sink mineralları və A və C vitaminləri ilə zəngin quruluşu sayəsində çuğundur tam müalicəvi təsirə malikdir. Çox aşağı kalorili olması, qaraciyərə müsbət təsir etməsi və uzun müddət toxluq hissini təmin etməsi çuğunduru gündəlik qida rasionumuzda əvəzolunmaz qidaya çevirir.

Qırmızı alma: Qanda şəkər tarazlığını qoruyaraq qan xolesterinə müsbət təsir göstərən qırmızı alma bu siyahıdakı ən əhəmiyyətli qidalardan biridir. Bu təsirlərə əlavə olaraq, qabıqlı balıqlarla birlikdə istehlak edildikdə bağırsaqların asan işləməsini təmin edir və qastritdən qaynaqlanan mədə yanmasını aradan qaldırır.

Pomidor: Ən güclü antioksidant komponentlərdən biri olan likopen pomidorda yüksək miqdarda olur. Pəhrizdən yüksək miqdarda likopenin qəbulu ürək-damar xəstəliklərindən qorunmaqda çox təsirlidir. Qeyd etmək lazımdır ki, bişmiş pomidorun tərkibində likopen yüksək olduğu üçün pomidoru bir az yağla bişirib yemək daha faydalıdır.

Nigar Orucova, “İki sahil”