Birləşmiş Ərəb Əmirliklərinin “Masdar” şirkəti və Gürcüstanın Enerji İnkişafı Fondu (GEDF) arasında Gürcüstanda ən böyük günəş elektrik stansiyasının (GES) inşası layihəsi çərçivəsində birgə iştirak müqaviləsi imzalanıb.

“İki sahil” xəbər verir ki, bu barədə “Masdar” sosial şəbəkədəki hesabında məlumat yayıb.

“Masdar” və GEDF Gürcüstanda ən böyük günəş enerjisi layihəsini həyata keçirmək üçün əməkdaşlıqda irəliləyiş əldə edib. Tərəflər aprelin 16-18-də keçirilmiş Ümumdünya Gələcəyin Enerjisi Sammiti çərçivəsində gücü 100 MVt-a qədər olan günəş fotoelektrik stansiyasının tikintisi üzrə birgə iştirak müqaviləsi imzalayıblar”, - deyə məlumatda qeyd olunub.

Bildirilib ki, xüsusi iş mexanizmi yaratmaqla müqavilə tərəfləri layihənin hazırlanması, layihələndirmə işlərinin həyata keçirilməsi, maliyyələşdirmə, satınalma, stansiyanın inşası, istismarı və texniki xidməti üzrə öhdəliklər götürəcəklər.