Dəniz verdiyindən daha tez-tez “götürür”: Bəzi insanlar tətildən sonra bir qolbağı, digərləri üzük və ya sırğası üçün darıxırlar. Ancaq bəzən elə itkilər eşidirik ki, bəlkə şanslı olarıq deyib bir metal detektoru ilə bütün sahili metodik olaraq yoxlamaq ürəyimizdən keçə bilər.

Bir cənub yay fırtınasından sonra sahildə gəzdiyinizi və ayaqlarınızın altında bir şey parıldadığını düşünün. “Patek Philippe” qol saatı! Təcrübəsizlər üçün izah edək: bu brend çox, çox elitdir, o qədər ki, hətta hər birinin sahibini müəyyən etmək üçün öz nömrəsi var.

Məhz belə bir saatı qayışsız, lakin işlək vəziyyətdə 29 yaşlı turist Krım sahilində tapıb.Tapıntını qiymətləndirmək üçün o, lombarda gedib.

Saat uzun müddət dənizdə qalmışdı, qayışı isə hardasa itmişdi. Amma mexanizmə heç nə olmamışdı, ona görə də tapıntı dəyərini itirməmişdi. Hazırkı vəziyyətində saat Rusiya valyutası ilə 11 milyon rubl dəyərində qiymətləndirilir.

Yeri gəlmişkən, saat nömrəsi ilə onun sahibini müəyyən etmək də mümkün olub. Üzə çıxıb ki, təxminən dörd il əvvəl - 2020-ci ildə sahibi özü onu suya atıb. Adı açıqlanmayan iş adamı Krım sahili yaxınlığında bir yaxtada - dostları, ulduzlar və bahalı tətilin digər iştirakçıları ilə güclü bir ziyafət verib. Onun bu qonaqlığa 3,5 milyon dollar xərclədiyi barədə şayiələr var.

Üç gün istirahət etdikdən sonra qərara gəliblər ki, geri qayıtmaq üçün inanclara hörmət etməli və dənizə bir şey atmalıdırlar. Qonaqlardan bəziləri bahalı saatları və zinət əşyalarını atıblar, ev sahibi isə həmin “Patek Philippe”i atıb.

Gənc oğlan saatı hərraca çıxarmaq qərarına gəlib. Onun kreditlərini bağlamaq və “Moskva və ya Krımda” mənzil almaq üçün kifayət qədər pulu olacaq.

Nubar Süleymanova, “İki sahil”